OEKUSI, 18 Juñu (TATOLI) – Diretór Aeroportu Rota do Sândalo iha Rejiaun Administrativa Espesiál Oekusi Ambeno (RAEOA), Silbano da Silva Ribeiro, informa katak, Aeroportu Rota do Sândalo seidauk bele hetan sertifikasaun husi Autoridade Aviasaun Sivíl Timor-Leste, Insitutu Públiku (AACTL,I.P) tanba presiza halo uluk manutensaun ba fasilidade sira.
Diretór ne’e relata bainhira hala’o enkontru ho ekipa pré-auditória husi AACTL,I.P hodi halo inpesaun ba fasilidade dokumentu inklui rekursu umanu, nu’udar ba preparasaun no prosesu sertifikasaun aeroportu internasionál Rota do Sândalo iha futuru.
Notísia relevante:AACTL sei sertifika Aeroportu Rota do Sândalo
“Fasilidade sira iha aeroportu ne’e, ami halo ona manutensau jerál no konsege rezolve ona ekipamentu lubun, maibé ekipamentu balun, ami labele konsege rezolve tanba ne’e presiza troka, sosa foun ho osan folin bo’ot, maibé ami tau ona iha Planu Asaun Anuál (PAA) 2026 nian, tanba ami presiza atu hadi’a manutensaun lubun ba iha aeroportu ne’e tanba durante ne’e sasán sira hahú 2019 to’o ohin sasán balun kleur ona, ita presiza update ka hola foun fali,” nia hateten iha Aeroportu Rota do Sândallo.
Nia sente orgullu ho prezensa AACTL iha Oekusi, hodi halo inspesaun ba fasilidade sira, nune’e bele sai baze atu prepara kompleta, maibé nia garante katak sei esforsa atu kumpre rekezitu no rekomendasaun sira tanba presiza AACTL sei kontinua verifika, liuliu implementasaun safety and security ne’ebé di’akliu, tanba auditóriu sei haree mós rekursu umanu, dokumentu, fasilidade no implementasaun servisu.
“Exemplu asuntu seguransa CCTV di’ak kala’e, stray sira tenke di’ak, ida-ne’e ami sei koordena fali ho AACTL, depois mak fó resposta, bainhira verifika katak buat hotu bele ona, tanba desizaun husi AACTL mak determina katak bainhira sertifika aeroportu ne’e hanesan operadór, ami prepara koordena ho reguladór sira, hodi apoia nafatin dalan atu hatudu padraun ICAO ho AACTL, hodi aeroportu ne’e bele atinje lalais sertifikasaun,” nia hateten.
Progresu preparasaun ba sertifikasaun aeroportu Rota do Sândalo kontinua la’o, hahú husi estabelesimentu akordu ofisiál Autoridade Navegasaun Áerea Timor-Leste, Institutu Públiku (ANATL,I.P) no hetan rekoñesimentu husi Ministériu Transporte no Komunikasaun (MTK).
Tanba ne’e kona-ba rekursu umanu sufisiénte tanba antes ne’e dezloka ona funsionáriu 40-resin hetan ona formasaun bázika iha Indonénzia.
Notísia relevante:Aviasaun Sivíl Indonézia sei fó asisténsia téknika iha aeroportu Rota do Sândalo
Iha fatin hanesan, Asesór Tékniku husi ANATL,I.P, Sabino Hendrique, ne’ebé hetan delegasaun atu apoia prosesu ba sertifkasaun aeroportu Rota do Sândalo Oekusi observa katak priénxe dokumentu maibé fasilidade presiza halo manutensaun.
“Tuir ha’u-nia observasaun katak ita to’o ona iha kritéria, bele prienxe ba sertifikasaun ne’ebé evidénsia ne’e, ita submete ona AACTL iha fulan kotuk, tan ne’e mak ohin sira mai halo pré-auditória ho intensaun atu halo evaluasaun, identifika buat ruma sei falta karik ita presiza hadi’a antes audit finál, ne’ebé prepara ba futuru sertifikasaun nian,” nia informa.
Jornalista Ajénsia Tatoli,I.P tenta konfirma ho parte AACTL,I.P maibé rejeita fó deklarasaun tanba laiha autorizasaun husi superior sira.
Notísia relevante:Rogério Lobato preokupa despeza no reseita husi operasaun aviaun ZEESM
Notísia relevante:RAEOA-ANATL selebra akordu ba operasionál aeroportu Rota do Sândalo
Jornalista: Abílio Elo Nini
Editór: Florencio Miranda Ximenes
