DILI, 30 Juñu 2026 (TATOLI)—Asosiasaun Futeból Dili Oeste (AFDO) hahú Kuarta (01/07/2026) loke rejistrasaun ba klube no eskola sira-ne’ebé hakarak atu kompete iha Kopa Juveníl Sub-15 no Sub-17 Mane.
“AFDO deside ona hahú ohin klube sira-ne’ebé pertense ba Dili Leste atu halo rejistrasaun hodi partisipa iha Kopa Juveníl Sub-15 no Sub-17 ne’ebé sei realiza iha 15 Jullu to’o 30 Agostu tinan ne’e,” Prezidente Asosiasaun Futeból Dili Oeste, Luís Evaristo Soares, dehan ba jornalista sira liuhusi konferénsia imprensa iha Sede AFDO, Delta 4, Tersa ne’e.
Nia hateten prosesu rejistrasaun ba Sub-15 no Sub-17 sei inklui eskola ensinu báziku no sekundária sira-ne’ebé pertense ba territóriu Dili Oeste nian hanesan Postu Administrativu Vera Cruz no Dom Aleixo. Tuir planu sei simu klube hamutuk 20 hodi partisipa iha kompetisaun ne’e.
“Antes hakat to’o mai iha-ne’e, ita komunika ona ho klube sira-ne’ebé partisipa iha Liga Futeból Timor-Leste, liuliu ba Sub-15 no Sub-17, atu partisipa iha eventu ne’e,” Luís informa.
“Iha ita-nia kritéria katak jogadór ne’ebe mak joga ona iha Liga Futeból Timor-Leste tantu segunda no primeira divizaun, ita la autoriza atu joga iha kopa ne’e rasik, tanba ita hakarak fó oportunidade ba jogadór seluk hodi hetan talentu foun,” Luís subliña.
Entretantu, Prezidente Komisaun Organizadora Kopa Juveníl, Jaime Hanjam, dehan obejetivu husi atividade referida atu promove talentu foin-sa’e sira.
“Ita hotu hatene futeból mak sai hanesan instrumentu oinsá akumula joven sira liuhusi atividade futeból, atu hatudu sira-nia abilidade no talentu iha baze bá to’o nasionál,” nia hateten.
Nia esplika prosesu rejistrasaun ba sub-17, loke ba klube sira-ne’ebé kompete iha liga Futeból Timor-Leste ne’ebé iha Sub-17.
“Ha’u fó ezemplu, Karketu Dili FC no klube profisionál sira seluk ne’ebé pertense ba Dili Oeste, karik iha Sub-17 sira iha direitu atu mai partisipa Kopa Juveníl. Enkuantu, ba sub-15 ita loke ba komunidade no eskola sira-ne’ebé iha klube,” nia esplika.
Kona-ba orsamentu rejistrasaun, Prezidente Komisaun Organizadór hateten kada klube bainhira halo rejistrasaun ho orsamentu $25. Klube sira bele rejistru direta no bele liuhusi online.
“Ida-ne’e ita atu fasilita prosesu administrasaun tanba orsamentu ne’ebé apoiu husi Federasaun Futeból Timor-Leste (FFTL) in-sufisiente. Ba ekipa kampiaun Sub-15 sei hetan orsamentu $300 ho tasa, segundu lugár $250 no terseiru lugár $150. Enkuantu ba mellór markadór sei hetan $50,” Hanjam informa.
Enkuantu ba Sub-17, daudaun nia prosesu la’o hela, depoiz komisaun sei anúnsiu iha loron tuirmai. Portantu, jogu faze grupu sei utiliza kampu Futeból FALINTIL-Forsa Defeza Timor-Leste (F-FDTL) no faze finál sei utiliza kampu FFTL. Kompetisaun referida ho lema “Promove Talentu Futeból Juveníl, Kria Ambiente Dame no Solidáriu”.
Jornalista: Osória Marques
Editór: Xisto Freitas da Piedade
