BOBONARO, 17 fevereiru 2023 (TATOLI)-Agrikultór sira komposta hosi Holsa, Odomau no suku Tapo-Memo, ne’ebé halo natar iha área SoSo to’o Tunubibi pertense ba postu administrativu Maliana, munisípiu Bobonaro hahú kuda ona hare époka dahuluk tinan 2023 utiliza udan-been.
Agrikultór suku Holsa, Diamantino dos Santos, esplika, atividade fila-rai hahú iha fulan-dezembru tinan kotuk, maibé tanba bee menus entaun foin mak hahú kuda.
Notísia relevante: Agrikultór Maliana hahú halai natar
“Komesa hosi janeiru mai ne’e udan la para. Ami butuk hare tiha, ami komesa kuda ona, tanba tinan-tinan ami halai natar depende ba udan-been de’it,” nia informa ba Jornalista Tatoli, iha natar SoSo, Maliana, sesta ne’e.
Nune’e mós agrikultór hosi suku Tapo-Memo, Marcelino Amarál, dehan tuir loloos hahú atividade kuda hare iha fulan-janeiru ne’e kedas, maibé la konsege tanba kanál irrigasaun tradisionál Mabil-Gol hetan estragu hosi inundasaun.
“Foin lalais agrikultura nasionál mak reabilita kanu ne’e, agora ne’e mai lancar loos,” nia katak.
Marcelino garante katak épokaa dahuluk ne’e se sei rezulta kuantidade produsaun sa’e, tanba udan-been di’ak no sufisiente fornese bee ba natar laran.
Nia husu ba diresaun servisu agrikultura munisípiu Bobonaro atu kontinua apoia bainhira hetan ameasa hosi pesti ruma.
“Ami iha tinan kotuk ne’e hanoin barak loos, tanba fila-rai tiha maibé rai maran hela. Agora ne’e barak hanesan ami fiar katak sei fó rezultadu di’ak mai ami,” nia hateten.
Tuir dadus hosi Ministériu Agrikultura no Peska (MAP) naran iha postu administrativu Maliana iha ektare 7,662. Hosi númeru ne’e iha tinan 2022 área kultiva 5,544 mak ativu ho nia rezultadu produsaun kada ektare tonelada haat.
Tinan ne’e rezultadu produsaun hosi agrikultór Maliana konsege hetan foos tonelada 21. Enkuantu dadus kona-bá natar Maliana mós iha 27,477 (lahan kering) ho nia produsaun 1,8 kada tonelada.
Notísia relevante: Agrikultór Maliana halai-natar ba faze daruak
Jornálista: Sérgio da Cruz
Editór: Evaristo Soares Martins
