DILI, 10 Jullu 2025 (TATOLI)–Atleta Teakwondo kontinua treinu no preparada partisipa iha kompetisaun modalidade Taekwondo iha eventu jogu entre Komunidade Nasaun Lian Portugés (CPLP-sigla portugeza).
Atleta Taekwondo, Deofia Barreto da Silva hateten preparasaun ba eventu entre nasaun lian portugés referida hala’o durante inísiu tinan-ne’e no kontinua konsentra másima iha fulan-Juñu.
“Ami-nia preparasaun di’ak tebes iha eventu jogu CPLP,” Deofia da Silva informa ba TATOLI iha Otél Ramelau, Aimutin, Dili, kinta ne’e.
Deofia salienta, nia parte prontu hasoru eventu ne’e tanba durante treinu matéria ne’ebé hetan kompostu husi téknika, tebe, fíziku no prepara mentál bainhira hasoru atleta adversária sira.
Iha fatin hanesan, Atleta Senhorita Xavier Pinto mós reforsa katak durante ne’e sira treinu ho másimu no kompleta ho fasilidade inklui akomodasaun ne’ebé fasilita hodi hasoru eventu CPLP iha modalidade Taekwondo.
“Ami garante bele hetan medalla osan-mean,” Pinto promete.
Atleta na’in-rua ne’e konfesa katak nu’udár timoroan sente orgullu hola-parte iha eventu internasionál entre CPLP ne’ebé Timor-Leste sai nu’udár uma-na’in nune’e sempre prontu hatudu prestasaun másima iha modalidade Taekwondo.
Atleta na’in-rua ne’e konsidera nasaun Brazíl mak sai ekipa forte iha modalidade Taekwondo maibé sempre prontu hatudu prestasaun no garante gaña medalla iha jogu CPLP.
Entretantu, Timor-Leste nia modalidade Taekwondo hamutuk atleta na’in-haat kompostu mane-rua ho kategoria klase kilógrama 51 no 55, nu-entantu feto-rua sei partisipa iha kategoria kilógrama 46 no 49.
Jornalista: Natalino Belo
Editór: Xisto Freitas da Piedade
