DILI, 06 Juñu 2025 (TATOLI)—Istória foun ida iha konetividade aérea Sudeste Aziátiku, ohin iha Aeroportu Internasionál Prezidente Nicolau Lobato, Dili ho Batik Air Malázia lansa ofisialmente voo direta dahuluk ne’ebé liga Dili ho Kuala Lumpur, Malázia.
Aviaun Batik Air tuun iha Aeroportu oras tuku 07h22 ne’ebé simu ho entuziazmu ho saudasaun rega ho bee no basa liman hosi bainaka sira ne’ebé marka prezensa iha serimónia lansamentu nian. Momentu ne’e marka marku importante ida, hodi halo Batik Air sai kompañia aérea Malázia dahuluk ne’ebé loke rota semo direta mai Timor-Leste.
Vise-Primeiru-Ministru no Ministru Koordenadór Asuntu Ekonómiku, Francisco Kalbuadi Lay, hateten lansamentu rota voo direta Batik Air nian husi Kuala Lumpur mai Dili marka pasu importante ida hodi hametin konetividade no kooperasaun entre Malázia no Timor-Leste.
“Ida-ne’e la’ós de’it loke oportunidade foun sira iha turizmu no komérsiu, maibé mós simboliza kolaborasaun besik entre nasaun rua ne’e iha espíritu integrasaun rejionál ne’ebé buras,” Vise-Primeiru-Ministru no Ministru Koordenadór Asuntu Ekonómiku, Francisco Kalbuadi Lay, iha Aeroportu Komoro, Dili, sesta ne’e.
Ministru Transporte no Komunikasaun, Miguel Marques Manetelu, hato’o bem-vindo no hateten prezensa Batik Air hanesan símbolu ponte foun ida entre nasaun rua ne’e.
“Ha’u hanoin ligasaun direta ne’e la’ós de’it dalan transporte nian, maibé odamatan ba oportunidade sira. Governu Timor-Leste sei kontinua fó apoiu rota ho suavidade no sustentabilidade,” Miguel Marques Menetelu hateten iha Aeroportu Komoro, Dili, sesta ne’e.
Iha fatin hanesan, Xefe Marketing Batik Air, Bavani Veeriah, reprezenta CEO Dato’ Chandran Rama Muthy, subliña importante husi rota ida-ne’e nu’udar espansaun ka haluhan iha konetividade aérea nian.
“Ami haree Díli hanesan sidade ida ho potensiál maka’as tantu iha turizmu, komérsiu, no kresimentu ekonómiku. Liuhusi konetividade ne’e, ami harii ponte ida-ne’ebé sei hametin relasaun sira entre nasaun rua ne’e,” nia hateten.
Nia afirma, ideia atu loke rota ida-ne’e mosu husi voo charter sira durante pandemia COVID-19. Obrigadu ba kna’ar ativu husi Embaixadór Malázia nian iha Timor-Leste, Amarjit Singh Sajid Singh, nune’e mós apoiu husi parte oioin iha nasaun rua ne’e, to’o ohin loron rota ida-ne’e konsege realiza ho susesu.
Tuir nia, rota ida-ne’e sei hala’o semana ida dala rua, kada segunda-feira no sesta-feira dadeer ho folin billete hahú husi $229.00. Vou ne’e hala’o uza aviaun Boeing 737, ho durasaun maizumenus oras haat (4) minutu 15.
Liuhusi lansamentu ida-ne’e hein atu hametin mobilidade ba viajante sira hanesan ba pasear, negósiu nomós asesu nakloke ba destinu liu 60 iha nasaun 20 liuhusi rede Batik Air iha Aeroportu Internasionál Kuala Lumpur (KLIA T1). Pasajeiru sira mós bele hili husi klase oioin, hahú husi Economy Super Saver to’o Business Class.
Batik Air rasik daudaun ne’e opera voo semanál liu 1,400 ho frota ida ho aviaun Boeing 737-800/8 NG 46 no Airbus A330-300 6, ne’ebé serve rede ida-ne’ebé luan iha Ázia, Austrália, Médiu Oriente no Ázia Sentrál. Kompañia aérea rejista volume pasajeiru millaun 4,5 iha 2023, aumenta ba millaun 6,6 iha 2024.
Entretantu, Embaixadór Malázia iha Timor-Leste, Amarjit Sarjit Singh, apresia ho kolaborasaun ne’ebé realiza ona no hato’o agradesimentu ba Governu Timor-Leste no parseiru sira hotu ne’ebé envolve iha serbisu ne’e.
“Maske hasoru dezafiu oioin, espíritu kooperasaun ne’ebé maka’as maka rezulta iha realizasaun ne’e. Ohin, hanesan ezemplu loloos ida husi saida mak ita bele alkansa hamutuk,” nia hateten.
Iha komunikadu imprensa ofisiál, Xefe Ezekutivu Batik Air Malázia, Datuk Chandran Rana Muthy, subliña nia kompromisu kompañia aérea nian hodi sai hanesan ponte ida entre nasaun sira. Nia bolu rota foun ne’e hanesan parte ida ba oin iha integrasaun rejionál no katalizadór ida ba kooperasaun kle’an liután entre Malázia no Timor-Leste.
“Ami orgullu sai hanesan kompañia aérea malázia dahuluk ne’ebé liga diretamente Kuala Lumpur ba Díli, no iha konfiansa katak servisu ne’e sei loke oportunidade oioin iha área edukasaun, komérsiu, turizmu no seluk tan,” nia hateten.
Hatene katak rota Kuala Lumpur-Dili komplementa rede semo direta ne’ebé eziste husi Darwin (Austrália), Singapura, Bali (Indonézia) no Xiamen (Xina).
Lansamentu rota Batik Air ida-ne’e hanesan marku istóriku ida-ne’ebé konfirma katak Timor-Leste nakloke ba beibeik no integra iha rede rejionál, enkuantu hametin relasaun ekonómika no sosiál entre nasaun sira iha Sudeste Aziátiku.
Jornalista : Arminda Fonseca
Editora : Cancio Ximenes
