DILI, 13 jullu 2023 (TATOLI)-Bispu eleitu Dioseze Baucau, Don Leandro Maria Alves, prezide misa agradesimentu ba komemorasaun aniversáriu Loron Nasionál Funsaun Públika ba dala-IX, kinta ne’e, iha Igreja Katedral Dili, ne’ebé iha biban ne’e nia husu funsionáriu tomak iha Timor-Leste atu serví nasaun ho domin.
“Iha misa agradesimentu (Loron Nasionál Funsaun Públika) ba dala-IX ne’e, ha’u husu funsionáriu tomak iha nasaun ne’e atu la’o tuir Jesus nia domin ne’ebé husik mai ita, mate iha kruz tanba hadomi ita, nune’e hanesan funsionáriu iha servisu hatudu domin ba malu serví nasaun ida-ne’e ho domin,” Don Leandro Maria Alves, hateten liuhosi nia omília.
Nia fó hanoin, funsionáriu sira tenke la’o tuir Jesus Kristu nia domin iha atividade hotu, iha servisu fatin atende maluk sira ho domin no hamnasa karik maluk sira husu tulun.
“Iha ita-nia servisu fatin nu’udár servidór nasaun, buka hatudu ita-nia an nu’udár sarani ne’ebé hadomi servisu ho domin no hatudu domin ba malu liuhosi la’o tuir Jesus nia ain fatin, oinsá hatene perdua ema, haree malu iha servisu fatin hanesan família no tama servisu ho pontualidade. Ida-ne’e mak la’o tuir Jesus nia ain fatin,” Bispu dehan.
Notísia relevante : Prezidente KFP espera Governu foun prioritiza idade serbisu efetivu funsaun públika
Amu Bispu refere ba Amu Papa Francisco nia liafuan ne’ebé hateten katak santu ne’e mosu bainhira ita hatudu servisu ho di’ak no ema ne’ebé sai santu liuhosi nia hahalok di’ak no atividade ne’ebé nia halo ho domin, liuhosi hatene hadomi no perdua ema.
Iha biban hanesan, Prezidente KFP, Faustino Cardoso, agradese ba uma-kreda nia apoiu durante ne’e.
“Lori funsionáriu 50.000 sira-nia naran hato’o agradese ba eklesia ka uma-kreda nia apoiu durante ne’e, liu-liu ohin bele apoiu liuhosi misa agradesimentu KFP nian ba dala-IX. Komemorasaun KFP iha tinan-ne’e importante tebes tanba iha tinan ne’e bele hetan Amu Bispu foun Dioseze Baucau nian, ne’ebé ohin mai hamutuk ho ita prezide misa. Ita mós agradese tanba ita foin liu situasaun polítika ne’ebé la’o ho di’ak to’o mai forma Governu da-IX, ida-ne’e hotu la’o di’ak tanba hetan tulun maka’as hosi parte igreja,” nia tenik.
Nune’e, Prezidente KFP husu nafatin uma-kreda nia apoiu, liu-liu orasaun nune’e funsionáriu hotu bele kontinua serví rai ida-ne’e ho domin.
“Ami husu nafatin parte uma-kreda nia akompañamentu, liu-liu orasaun hodi nafatin akompaña ami ho orasaun, nune’e ami bele serví di’ak liután nasaun ida-ne’e la’o tuir Jesus nia ain fatin ne’ebé serví nasaun ho domin,” nia salienta.
Tuir observasaun Agência Tatoli iha terrenu, nota katak misa agradesimentu ne’e ladún hetan partisipasaun másimu hosi funsionáriu sira
Misa ne’e hetan partisipasaun hosi Sekretáriu Estadu Komunikasaun Sosiál, Expedito Dias Ximenes, inklui membru IX Governu seluk hamutuk ho funsionáriu sira.
Jornalista : Arminda Fonseca
Editora : Julia Chatarina
