DILI, 10 agostu 2020 (TATOLI)-Diretór Ezekutivu Asosiasaun Defisiénsia Timor-Leste (ADTL), Cesário da Silva, hateten tempu besik defisiénsia Timoroan hamutuk 35 sei partisipa ezame ekivalensia nivel ensinu sekundáriu.
Defisiénsia 35 ne’e kompostu husi defisiénsia matan, tilun no fiziku, tanba antes ne’e sira ramata ona ezame nivel ensinu báziku.
“Ita iha maluk defisiénsia na’in tolu mak ramata ona nivel primaria(ensinu baziku) iha Kupang no na’in 32 ita hamutuk ho Dirasaun Ensinu Rekorente hodi formaliza ezame nivel primaria iha ADTL,” dehan nia ba jornalista sira iha edifísiu MEJD Vila Verde Dili, segunda ne’e.
Notísia Relevante :Defisiénsia rihun 25 seidauk asesu edukasaun
Iha nivel ensinu báziku, ADTL prepara iha faze tolu to’o lima no agora sira hakat ona ba faze neen nivel ensinu sekundáriu nian.
“Ezame ne’e sei realija tuir kalendáriu Ministériu Edukasaun Juventude no Desportu nian no profesór sira ne’ebé sei fo ezame maihusi Diresaun Nasionál Ensino rekorente,” katak nia.
Husi parte ADTL prepara de’it maka fatin ba realiza ezame, enkuantu kona-ba ekipamentu, profesór no materiál ezame sei prepara husi Ministériu Edukasaun Juventude no Desportu.
“Materia báziku ne’ebé Ministériu Eedukasaun prepara mak hanesan matemátika inglés, istória no portugués,” nia hateten.
Jornalista : Tomé Amado
Editór : Agapito dos Santos
