DILI, 22 Maiu 2026 (TATOLI)—Ekipa DIT FC falla rekolla pontu tolu (3) iha jogu dahuluk Primeira Divizaun Liga Futeból Timor-Leste époka 2026 bainhira lakon 0-1 ho nia adversariu Santa Cruz FC iha jogu ne’ebé realiza iha Estádiu Munisipál Dili, sesta kalan.
Bainhira jogu hahú ekipa rua lansa kontra no atake maka’as ba malu atu buka hatama golu fó vitoria ba ekipa ida-idak.
Kontra atake liuhusi tékniku no abilidade jogadór sira iha, maibé forsa husi armada rua laiha diferensa, ikus jogu ne’e tenke hela ho empata iha minutu primeira parte ho rezulatdu 0-0.
Dolar ba segubda parte, ekipa rua nafatin lansa kontra no atake ba malu, Santa Cruz lansa atake ne’ebé adekuadu, maibé atake hirak ne’e seidauk kona iha alvu. DIT mós lakohi lakon oportunidade, lansa atake ne’ebé brillante, maibé buat hotu hela de’it ho naran tanba la prodús golu.
Santa Cruz la rende, kontinua joga foti oin, kontinua iha vontade, ikus esforsu hirak ne’e la hela de’it hanesan esforsu, iha minutu 73, Alexander Moreira lansa golu ida hodi muda skoru ba 1-0.
Rezultadu ne’e mantein to’o jogu termina no ikus vitória hela ho Santa Cruz hodi xave pontu tolu (3), enkuantu DIT hela ho derrota no pontu zero.
Jornalista : Hortêncio Sanchez
Editór : Cancio Ximenes
