DILI, 06 juñu 2023 (TATOLI) – Diretór Klíniku iha Hospitál Nasionál Guido Valadares (HNGV), Marcelino Correia, hateten eletrisidade ne’ebé mate lakan iha kapitál Dili, fó impaktu ba ekipamentu sira ne’ebé mak iha Hospitál Nasionál Guido Valadares (HNGV).
“Ahi mate lakan ne’e dahuluk nia impaktu ba iha ita-nia ekipamentu sira iha HNGV, liuliu ba sira ne’ebé mak servisu liga liu ba atendimentu pasiente, mákina laboratóriu ida prosesa ran nian ne’e nia hetan hela problema tanba ahi mate lakan, depois impaktu mós mak mákina ne’ebé mak fase ran nian, tanba bainhira ahi mate, sira loke fali jeradór, bainhira ahi lakan fali taka fali jeradór, ne’ebé nia implikasaun afeta ba ekipamentu sira iha HNGV”, Marcelino Correia afirma iha HNGV ohin.
Nia dehan, ho ida ne’e HNGV halo kontaktu ba EDTL atu halo liña rua mai iha HNGV, atu ida mate, ida moris nafatin, hodi apoiu eletrisidade iha ospitál, entaun EDTL responde duni atu liga liña rua mai HNGV hodi labele fó impaktu, bainhira liña ida mate, liña ida nafatin lakan.
“Ita-nia jeradór ne’ebé mak iha ospitál ne’e iha rua maibé ida nia forsa la to’o, bainhira loke jeradór loke de’it ba fatin ne’ebé mak presiza duni, entaun eletrisidade ba sira seluk tenke mate, tanba mákina ida boot ne’e tuan ka kleur ona ne’ebé ladún di’ak, utiliza mak jeradór seluk maibé nia enerjia ladún forsa”, nia afirma.
Nia dehan, jeradór ne’ebé apoiu mak iha sala operasaun, laboratóriu, fase ran, fatin internamentu sira,no departamentu seluk labele tanba jeradór nia forsa la to’o.
Jornalista : Felicidade Ximenes
Editór : Zezito Silva
