DILI, 28 Maiu 2026 (TATOLI)–Xefe Seksaun ba Manutensaun Sinál Tránzitu iha DNTT, Eugénio da Silva, akompañadu husi empreza Bandidu Qualidade (BQ) hahú pinta zebra cross no sinál tránzitu sira iha kapitál Dili.
Servisu pinta zebra cross ne’e empreza hahú implementa iha semana kotuk no sira hahú pinta husi diresaun rotunda Nikolau Lobato, Komoro to’o Ponte Prezidente BJ Habibie, iha Bidau Santana.
“Agora daudaun ita konsentra pinta uluk iha área sentru kapitál ka dalan protokolu molok kontinua ba fatin seluk ne’ebé tama ona iha planu projetu nian,” Xefe seksaun ne’e relata ba Agência Tatoli iha Timor Plaza, ohin.
Nia hatutan, hafoin empreza finaliza pinta iha dalan protokolu sira mak faze tuir mai sei kontinua pinta mós iha área seluk hanesan Bidau, Akadiruhun to’o Katedral Vila Verde no Bairru Pite, enkuantu fatin seluk seidauk tanba sei iha prosesu alargamentu estrada.
“Prosesu pinta zebra Cross ne’e empreza hala’o servisu iha tempu kalan tanba iha loron ne’e motorista sira halo movimentasaun, entaun sira prefere iha kalan atu labele hetan impedementu ruma iha terrenu,” nia dehan.
Aleinde ne’e, nia dehan, tanba empreza la’ós pinta de’it zebra cross maibé sira mós pinta sinál iha dalan ninin no sinál tránzitu sira seluk hodi garante seguransa urbana iha estrada públiku.
Enkuantu projetu ne’e implementa husi empreza Bandidu Qualidade ho durasaun tempu fulan-neen no kona-ba orsamentu sira ladun hatene tanba ne’e kobre husi fundu infraestrutura.
Iha biban ne’e, Enjiñeiru Responsável Empreza Bandidu Qualidade, Middo Boru, informa orsamentu ba projetu pinta zebra cross ne’e hamutuk $300.000.
Nia haktuir, tinta ne’ebé sira sosa ne’e hamutuk ton 77 husi Indonézia no Austrália ne’ebé ho marka Cat Thermoplastic AASTHO M 249-98 (white) no Glassbead Australia Potters AASTHO M 247-09.
“Tinta hirak ne’e enjiñeiru sira pinta ho mákina Cat Mark Jalan, la’ós uza manuál ka pinta uza liman no kuas,” responsavel ne’e dehan.
Jornalista : Alexandra da Costa
Editór : Cancio Ximenes
