DILI, 08 agostu 2022 (TATOLI)—Eskola Ensinu Sekundáriu Jerál (ESJ) 04 setembru UNAMET, Balide, adia ezame períodu daruak iha loron dahuluk nian, ba estudante hamutuk 360, ne’ebé okupa sala ualu iha Eskola Ensinu Báziku Sentrál (EBC, sigla portugés) Fatu-meta.
Diretora Eskola EBC Fatu-meta, Fernanda Caldera Belo, hateten, ezame adia fali ba tersa tanba mosu fallansu tékniku, ne’ebé estudante na’in-360 labele utiliza sala aula ualu iha eskola Fatu-meta hodi partisipa iha ezame.
“Loloos laiha problema, maibé dirijente eskola rua maka halo komunikasaun tarde hodi prejudika fali ba labarik sira, nune’e adia sira-nia ezame,” Diretora informa iha Eskola EBC Fatu-meta, segunda ne’e.
Notísia relevante: Eskola ESJ 04 setembru prepara diploma 1.200 hodi DSED sesante asina
Nia dehan, Eskola Fatu-meta laiha intensaun atu taka dalan ba estudante Eskola ESJ 04 setembru hodi tuir ezame períodu daruak tanba Ministériu Edukasaun Juventude no Desportu (MEJD) husu ona ba parte Eskola Fatu-meta hodi oferese sala ualu sai klase paralela ba estudante Eskola ESJ 04 setembru.
“Ami na’in-rua ninia komunikasaun maka tarde, tanba ne’e maka mosu fallansu tékniku ne’e,” nia akresenta.
Tuir Diretora, nia hetan kontaktu hosi Diretór Eskola ESJ 04 setembru iha sesta katak sira kontinua utiliza sala ualu ba ezame maibé tarde liu ona tanba responsável ssira fila hotu ona ba uma.
“Aala sira iha Eskola Fatu-meta ne’e prienxe hotu ona ho oráriu ba ninia estudante atu partisipa iha ezame períodu daruak. Ita preokupa tanba oráriu ba estudante Eskola Fatu-meta termina hotu. Atu muda fali presiza hetan konkordánsia hosi Adjuntu, Gabinete Apoiu Tékniku (GAT) inklui profesór sira,” nia tenik.
Maski nune’e, Diretora Eskola Fatu-meta no Dirijente Eskola ESJ 04 setembru halo esforsu nune’e iha segunda ne’e parte rua konsege hasoru malu iha Eskola Fatu-meta no konsege rezolve asuntu ne’e, nune’e estudante 360 hahú ezame iha tersa to’o sábadu semana ne’e.
Iha fatin hanesan, Diretór Eskola ESJ 04 setembru UNAMET, Sérgio de Jesus, husu kompreensaun estudante sira.
“Estudante sira sei kompleta ezame to’o sábadu atu kompleta matéria tolu ne’ebé la konsege realiza iha segunda. Ha’u husu ha’u-nia estudante sira atu prepara imi-nia an ba tersa tanba ohin segunda imi labele tuir ezame tanba iha fallansu, maibé imi sei tuir fali ezame hahú tersa to’o sábadu, maibé sábadu imi tuir de’it ona iha Eskola Balide,” Diretór eskola dehan.
Jornalista : Tomé Amado
Editora : Julia Chatarina
