DILI, 02 fevereiru 2024 (TATOLI)—Vise Prezidente Komisaun G, Deputadu Gabriel Soares, hateten iha rezultadu Komisaun G nia atividade hala’o fiskalizasaun ne’e hatudu katak Eskola Ensinu Sekundáriu Tékniku Vokasionál 28 Novembru Becora ninia atividade ensinu aprendizajen la’ o di’ak tebes.
Notísia Relevante: Eskola ESTV 28 Novembru menus profesór
Komisaun apresia tanba Diretór eskola ho manorin sira iha ne’eba, sira-nia finalista destaka ba hala’o mós estájiu tuir kada área estudu estudante sira-nian hanesan eletrisidade, administrasaun, kontabilidade hodi ba to’o iha munisípiu sira.
“Ami observa direitamente aula la’o normál no estajiáriu sira iha ida-idak nia fatin. Ha’u orgullu tebes ita-nia manorin sira-ne’ebé hanorin iha eskola Tékniku Vokasionál 28 Novembru, tanba haree mestre sira kreativu tebe-tebes. Ita haree, iha área informátika ninian sira iha komputadór 30 no mestre fasilitadór akompaña no sira hakarak ministéiru aumenta fasilitadór na’in-ida hodi sira-nia aula efetivu liu,” Vise Prezidente Komisaun G trata asuntu Edukasaun, Juventude, Desportu no Kultura ne’e hateten iha uma fukun PN.
Aleinde ne’e, Komisaun G mós hala’o vizita ba laboratóriu eletrisidade nian ne’e furak tebes-tebes, nune’e ba oin presiza investe di’ak liután bele sai eskola tékniku vokasionál ne’ebé timoroan hotu hakarak.
Tanba ne’e, nia rekomenda ba Ministériu Edukasaun (ME) tau matan liuliu iha observasaun komisaun nian haree buat balun seidauk di’ak iha eskola ne’e, ezemplu hanesan iha plafon eskola nian presiza foru tanba manas tanba iha sala-de-aula ida no rua haree presiza tau matan.
Buat seluk, tuir nia, moru protesaun iha kotuk ne’ebé liga ho komunidade ninia hela fatin, tanba bainhira udan makaas bee lazuli ba li’ur, nune’e presiza haree hodi labele difikulta prosesu aprendizajen
Kona-ba projetu konstrusaun komunitáriu ba sala-de-aula iha eskola Ensinu Sekundáriu Tékniku Vokasionál 28 Novembru Becora ne’e komisaun hare finaliza hotu ona.
Aleinde ne’e, Komisaun G mós halo fiskalizaun ba eskola Pres-Eskolár rua iha Dili laran hodi haree besik liután kona-ba sira-nia atividade aprendizajen, no rezultadu hatudu atividade ensinu iha eskola rua refere la’o ho di’ak.
“Ekipa ba to’o iha ne’eba hala’o fiskalizasaun la’o di’ak. Hanesan fiskalizasaun ba eskola pre-eskolár Karidade iha Kintál Boot ho totál estudante 180, fahe ba turnu haat, prosesu ensinu aprendizajen atividade la’o di’ak,” nia dehan.
Nia hateten, mezmu setór edukasaun ne’e área ida kompleksu tebes maibé komisaun sente kontente tanba haree ho diretora eskola pre-eskolár Karidade hamutuk ho manorin sira jere karga oráriu ho di’ak tebes.
Iha bibán ne’e, komisaun mós haree konstrusaun projetu komunitária sira-ne’ebé nia orsamentu aprova iha tinan 2021 kuaze millaun $20, Governu anteriór aloka iha kategória transferénsia públika atu halo sala-de-aula iha territóriu laran.
Ba projetu komunitáriu ne’ebé hala’o iha eskola pre-eskolár Karidade nia foin atinje 30%-ital agora lao hela ho di’ak mezmu nia orsamentu atribui tarde no sira mós hala’o tuir atribusaun orsamentu ne’ebé iha no sira fó hanoin PN liuhusi komisaun G katak, sira sei finaliza iha fulan marsu tinan ne’e.
Hafoin ne’e, Deputadu komisaun G mós kontinua halo fiskalizasaun ba eskola pre-eskolár Estrela iha Becora, Dili, ne’ebé haree atividade ensinu la’o di’ak tebes.
Iha eskola pre-eskolár ne’e iha manorin na’in-rua, tanba kestaun saúde nune’e sira deskansa hela iha uma, entaun ne’e difulta uitoan diretora eskola ne’e atu halo karga oráriu. Maibé, komisaun apresia ho diretora eskola pre-eskolár ne’e ho pasiénsia tebes oinsá jere eskola ne’e no atividade la’o di’ak.
Kona-ba konstrusaun projeitu komunitária iha eskola pre-eskolár Estrela rasik la’o di’ak, nune’e komisaun apresia grupu badean sira hanesan mós inan-aman sira envolve konstrusaun hala’o kualidade di’ak no iha enjineiru sira akompaña. Mezmu atribuisaun projetu ne’e tarde uitoan, nune’e sira garante orsamentu la falla sei finaliza tuir tempu determinadu.
Tan ne’e, Deputadu Gabriel Soares, hateten PN liuhusi komisaun G iha papel importante hodi fiskaliza haree kona-ba progresu no difikuldade saida mak eskola no manorin ho estudante sira hasoru iha terrenu, mak sei tau iha relatóriu no sei rekomenda ba Ministériu Edukasaun (ME) hodi bele tau atensaun
Jornalista : Nelson de Sousa
Editór : Cancio Ximenes
