BAUCAU, 13 marsu 2024 (TATOLI) – Prosesu distribuisaun foos subsídiu ne’ebé aloka iha munisípiu Baucau la sufisiente atu distribui to’o iha suku hotu iha munisípiu Baucau.
Xefe Servisu Ministériu Komérsiu no Indústria (MKI) Baucau, Sabino dos Santos Oliveira, esplika, razaun subsídiu foos la sufisiente atu distribui to’o iha suku tanba bazea ba akordu entre Governu ho emprezáriu importadór ne’ebé iha limitasaun kuantidade nune’e bainhira to’o iha munisípiu foos hirak-ne’e labele kobre to’o suku hotu iha munisípiu Baucau.
“Subsídiu ne’e mai dala ida de’it hotu kedas iha munisípiu laran, labele to’o iha suku, seluk fali apoiu subsídiu ba importador sira depende mós ba tranzaksaun, se iha Dili sosa foos pursentu 10 entaun lori ba suku mós tenke aumenta pursentu 10,” Xefe Servisu MKI Baucau hateten iha Vila Nova, kuarta ne’e.
Alende ne’e, razaun seluk apoia subsídiu ba importadór hodi fa’an foos iha munísipiu ho folin saku ida $10.00 nune’e prosesu intervensaun folin foos iha limitasaun tempu nune’e defisil atu distribui to’o suku sira-ne’ebé kategoria rurál iha munisípiu Baucau.
Sabino Oliveira, rekoñese, daudaun ne’e folin foos iha munisípiu Baucau hahú sa’e hikas iha merkadu, liuliu iha suku rurál sira tanba distánsia no kondisaun estrada ne’ebé estragus.
Xefe Suku Afaloicai, Germano João Baptista, hateten, Ministériu Komérsiu no Indústria (MKI) antes ne’e esforsu ona hodi aprova subsídiu ba empreza importadór hodi reduz folin foos merkadu maibé laiha rezultadu tanba iha suku folin foos no nesesidade bázika kontinua sa’e.
Komunidade iha suku refere halerik folin foos sa’e tanba foos hosi postu Uatulari, munisípiu Viqueque ne’ebé kilograma 25 ho folin $20.50, kilograma 20 ho folin $19.00.
Enkuantu hosi emprezáriu lokál Baucau ne’ebé fa’ann foos to’o Afaloicai maioria ho kategoria folin hanesan foos kilograma 20 ho folin $18.50, kilograma 25 nia folin $19.50, mina bimoli litru 5 no folin 9.50, supermi sedaap kaixa ida ho folin $ 8.50.
“Folin nesesidade báziku sa’e hanesan ita la hatene kauza saida, realidade agora fó impaktu ba komunidade sira, karik kondisaun estrada mak empreza sira fa’an nunee mos ita la hatene,” Germano Baptista hateten.
Germano Baptista, husu ba Governu liuhosi Autoridade Munisípiu Baucau atu kontrola sasán nesesidade báziku ne’ebé kontinua sa’e iha merkadu tanba bele impaktu ba povu liuliu iha área rurál hanesan suku Afaloicai.
Jornalista : Natalino Belo
Editór : Evaristo Soares Martins
