DILI, 07 fevereiru 2024 (TATOLI)–Sekretáriu Estadu Formasaun no Profisionál (SEFOPE), Rogério de Araújo Mendonça, hateten, Japaun liu-liu Governu lokál Kochi hakarak simu traballadór timor-oan maibé husu atu influente iha lian Japaun no hatene kultura Japaun nian.
“Governu lokál Japaun sira hateten katak timor-oan sira ne’ebé atu bá serbisu iha Japaun tenke prepara-an uluk mak lian tuir mak kultura, tanba lian ne’e importante tebes hodi halo komunikasaun,” Governante ne’e hateten hafoin asina akordu, iha salaun SEFOPE, Caicoli, kuarta
SEFOPE planeia atu loke sentru formasaun ida iha Dili hodi fasilta timor-oan sira apreende lian Japaun hodi bele asesu ba merkadu iha Japaun.
“Bele hateten katak merkadu iha Japaun ne’e barak tebes, entaun ita atu prepara rekursu sira, problema ne’ebé ita hasoru iha Timor mak sentru formasaun tolu lian Japaun maibé ne’e mós instituisaun privadu, la’ós kontrola hosi SEFOPE nian, entaun ba ami presiza mós harii sentru formasaun pilotu ida iha kapitál hodi joven sira bele asesu ba formasaun ne’e nune’e sira bele asesu ba merkadu iha Japaun,” nia akresenta.
Notísia relevante : SEFOPE despede timor-oan na’in-hitu ba serbisu iha Japaun faze daruak
Sentru formasaun tolu ne’ebé hanorin lian Japaun mak hanesan Centro Mirai Sato Suai, Centro Quesadhip Ruak (CQR), Young Men’s Christian Asociation (YMCA).
Ho ida-ne’e, Governante ne’e salienta katak, daudaun sira sei hasoru Embaixadór Japaun iha Timor-Leste, Tetsuya Kimura, hoid diskute liután planu ne’e molok parte rua avansa ba oin hodi estabalese sentru refere.
Sorin seluk, Embaixadór Timor-Leste iha Japaun, Ílidio Ximenes da Costa, argumenta katak daudaun iha ona provínsia neen hanesan Hiroshima, Kochi Marutaka, Fukui, Saitama, no Inacity preparadu atu simu timor-oan sira.
“Maibé persiza follow-up fali enkontru ne’ebé ha’u halo ona, difikuldade ida mak ha’u hasoru agora ne’e mak hosi Ministériu Negósiu Estranjeiru no Kooperasaun (MNEK) haruka ona karta mai ha’u-nia sekretáriu tenki fila ona ba Timor no SEFOPE rasik mós seidauk iha pontu fokál ida iha Embaixada, tauk mak para iha dalan klaran no lakon oportunidade ne’ebé iha,” Diplomata ne’e preokupa.
Jornalista : Antónia Gusmão
Editora : Julia Chatarina
