DILI, 27 jullu 2023 (TATOLI)- Prezidente Parlamentu Nasionál, Deputada Maria Fernanda Lay, kinta ne’e, simu audénsia hosi Reprezentante UNFPA iha Timor-Leste, Pressia Arifin-Cabo, hodi ko’alia kona-ba investe iha setór saúde ba inan ho oan iha Timor-Leste.
“UNFPA apoia tebe-tebes no husu Parlamentu nia atu husu ba Governu investe mak iha kuidadu ante natál inan sira ne’ebé isin rua, liuliu kuidada ne’ebé di’ak no kualidade nune’e bele rezolve sira nia problema anemia, má-nutrisaun, infesaun no problema sira seluk ne’ebé bele halo sira no sira nia bebé mate, ida ne’e bele hadi’a períodu durante ante natál,” Reprezentante UNFPA iha Timor-Leste, Pressia Arifin-Cabo, hateten ba jornalista sira hafoin ramata enkontru ho Prezidente Parlamentu Nasionál, iha PN.
Nia dehan, durante sorumutu Prezidente Parlamentu Nasionál nia kompromete atu apoiu saída mak programa sira aprezenta atu husu ba Governu investe.
“Tanbá saida mak saúde inan importante tebes ba ita nia nasaun, razaun dahuluk mak tinan-tinan iha Timor-Leste iha inan hamutuk 4.000, ne’ebé isin rua,hosi númeru ne’e, iha 6.000 enfrenta risku bele mate tanbá komplikasaun oioin ne’ebé bele mosu bainhira sira isin rua ka tur ahi,” katak nia.
Tuir dadus estatístika hatudu inan isin rua hamutuk 57% mak ba tuur ahi iha fasilidade saúde sira, ida ne’e piór liután, tanbá sira ne’ebé ho 43% ne’e tur-ahi iha uma ne’ebé laiha atendimentu ne’ebé mak di’ak.
“Razaun oioin sira la bá tur-ahi iha fasilidade saúde tanba haree laiha serbisu kualidade iha ita nia fasilidade saúde sira ne’e hotu no sira mós hasoru barreira sosiál, kulturál ho sira seluk, nune’e halo sira la mai iha fasilidade saúde,” nia afirma.
Tanba ne’e, nia afirma presiza iha investimentu ba ekipamentu ho formasaun ba pesoál saúde sira atu iha kapasidade di’ak hodi asegura kuidadu inan isin rua sira.
Alende ne’e, reprezentante ne’e husu mós apoia ba Parlamentu Nasionál atu rekomenda ba Governu atu aloka finanseiru hodi investe iha saúde materna atu hadi’a kualidade ba atendimentu serbisu inan sira ne’ebé tur-ahi.
Jornalista: Nelson de Sousa
Editór : Florencio Miranda Ximenes
