DILI, 11 abríl 2023 (TATOLI)–Reitór Universidade Nasionál Timor Lorosa’e (UNTL), João Soares Martins, husu ba estudante finalista tinan akadémiku 2022 hamutuk 1.408 ne’ebé simu ona graduasaun iha tinan 2023, atu kontinua kapasita an nafatin hodi partisipa iha prosesu dezenvolvimentu ba konstrusaun Estadu Timor-Leste.
“Ohin loron ida importante tebes ba istória Universidade Nacional Timor Lorosa’e nian espesiál ba Timor-Leste, tanba serimónia graduasaun ba tinan ida-ne’e, diferensa ho sira-ne’ebé halo ona iha tinan sira liu ba kotuk. Iha momentu ne’ebá ema sira-ne’ebé mai partisipa iha serimónia graduasaun ne’e tenke tuur dook malu uza hand sanitezer, maibé liu osi esforsu no servisu mak hosi entidade hotu hamutuk ho Ministériu Saúde ohin loron TL bele deklara ona livre hosi pandemia COVID-19,” nia dehan iha serimonia graduasaun, tersa neé.
Nia husu ba estudante graduadu sira hotu ba tinan ida-ne’e atu aproveita oportunidade di’ak ne’e hodi estuda makasa, mezmu simu ona graduasaun maibé tenke nafatin kapasita an nafatin hosi formasaun sira-ne’ebé adekuadu atu iha futuru bele partisipa liután iha prosesu konstrusaun estadu TL nian.
Nasaun TL atu dezenvolve ninia an sai nasaun ida dezenvolvidu presiza ema matenek ho vizaun luan.
Ne’e duni estudante UNTL sira tenke preparadu. buka adapta-an ho dezenvolvimentu mundu ohin loron nian, atu nune’e bele kompete iha merkadu traballu tanba TL daudaun ne’e halo hela esforsu makaas atu sai nasaun membru AZEAN.
Ne’eduni, nia dehan, rekursu umanu sira mós tenke preparadu hodi bele responde ezijénsia ne’ebé mak AZEAN presiza.
Purtantu dadus estudante finalista UNTL tinan akadémiku 2022 nian ne’ebé simu ona graduasaun ne’e hamutu 1.408, hosi totál estudante sira-ne’e kompostu hosi programa baxarelatu no lisensiatura 1.380 no programa pos graduasaun no mestradu hamutuk 28.
Enkuantu ba tinan ida-ne’e totál estudante graduadu ne’ebé barak kuaze mai hosi Fakuldade Edukasaun Arte no Umanidade (FEAH) hamutuk 500, depois tuir estudante hosi Fakuldade medisina siénsia saúde hamutuk 359, kompostu hosi departamentu enfermajen 88 no departamentu parteira 90.
Fakuldade enjeñaria siénsia no teknolojia 136, Fakuldade Agrikultura 118, Fakuldade Siénsia Sosiál 108, Fakuldade Ekonomia no Jestaun 96, Fakuldade Diretu 35, Fakuldade Filozofia 24 no Fakuldade siénsia ezata na’in-ida (1).
Hosi programa pos graduasaun no peskiza ne’ebé ohin simu mós graduasaun ne’e hamutuk 20 ne’e kompostu hosi na’in-ualu (8) mestradu no na’in 12 hosi programa pos graduasaun.
Entretantu, programa post graduasaun no peskiza UNTL ne’e foin ofisialmente foin mak lansa iha 28 jullu 2011.
Serimónia graduasaun UNTL nian ba inísiu 2023 ne’e, realiza iha parte rua dadeer no lorokraik no serimónia ne’e hetan partisipasaun hosi Prezidente Repúblika, Ministru Ensinu Superiór Siénsia no Kultura, Prezidente Komisaun Funsaun Públiku, Provedoria dos Diretu Umanu no Justisa.
Jornalista : Tomé Amado
Editór : Cancio Ximenes
