COVALIMA, 16 juñu 2023 (TATOLI)–Prezidente Konsellu Veteranu Munisípiu Covalima, Osorio Soares “Mausoko” hateten, Konsellu veteranu lahatene progresu servisu hosi grupu veteranu hakiak karau no fini, tanba koordenadór grupu la submete relatóriu progresu servisu ba konsellu veteranu.
Notísia Relevante: Fundu kontributivu veteranu millaun $34 iha konta veteranu
“Iha Munisípiu Covalima estabelese grupu haki’ak karau iha postu Maucatar no haki’ak fini iha postu Zumalai, maibé to’o ohin loron xefe grupu la relata relatóriu progresu servisu mai ha’u, no laiha koordenasaun nune’e ha’u la hatene progresu serbisu,” Osorio Soares “Mausoko” hato’o ba Agência Tatoli, iha nia kna’ar fatin, sesta ne’e.
Tuir nia, tnba xefe grupu la submete relatóriu entaun Konsellu Veteranu lahatene progresu servisu estabele grupu hakiak karau no fini.
Tuir loloos, nia hateten, xefe grupu tenke submete relatóriu nune’e konsellu veteran munisipál bele kontrola.
“Ha’u atu kontrola xefe grupu tenke koordena ho ha’u, nune’e ha’u bele observa direta haki’ak karau no fini. Maske ha’u kontaktu ona, maibé xefe grupu mak hakarak jere osan rasik,” nia dehan.
Enterantu, Inisiativa husi Servisu Apoiu Sosiedade Sivil no Auditória Sosial (SASCA) hamutuk ho Konselu Kombatente Libertasaun Nasionál (CCLN, Sigla Portugés) forma grupu ba veteranu sira ho grau 0-3 no grau 4-7 hodi haki’ak animál hanesan manu, fahi no karau no ikan.
Maibé iha Munisípiu Covalima, estabelese de’it grupu rua hanesan grupu haki’ak karau estabelese iha postu administrasaun Maucatar no haki’ak fini ne’ebé estabelese iha postu administrativu Zumalai.
Fundu hosi SASCAS ne’e fó prióridade apoiu ba veteranu sira ho grau 0-3 no grau 4-7 sei fahe osan totál osan hamutuk $38.000 hosi orsamentu ne’e fahe ba estudante nivél ensinu sukundária $10.000, veteranu forma grupu $20.000 no osan transporte no konbusível $8000.
Jornalista : Celestina Teles
Editór : Cancio Ximenes
