BAUKAU, 13 Abríl 2026 (TATOLI) – Dirijente Ospitál Rejionál Eduardo Ximenes (HoREX, sigla portugés) kontinua kontrola ai-han ne’ebé kompañia fornese ba pasiente ne’ebé hala’o tratamentu iha ospitál referida.
Diretór HoREX Baukau, Claudino Ximenes, esplika, durante ne’e hahán ne’ebé oferese ba pasiente la’o-tuir padraun ne’ebé estabelese husi governu liuhusi Ministériu Saúde maibé rekoñese difikuldade mak estoke hahán lokál ne’ebé menus nune’e difikulta fornesimentu hahán tuir padraun ne’ebé estabelese.
“Ami fó xamada, ami-nia hakarak ne’ebé na’an no ikan tenke fresku maibé kompañia hasoru difikuldade menus produtu iha merkadu,” Diretór HoREX Baukau hateten iha ninia kna’ar-fatin, Vila Nova, Segunda ne’e.
Claudino Ximenes, relata, kada loron pasiente iha HoREX konsumu hahán loron-ida dalima maibé hahán referida la tuir menu hanesan hudi troka ba ai-dila, modo mostarda troka ba kangkung, ikan no na’an importadu tanba hasoru difikuldade menus estoke iha merkadu.
Alende ne’e, pasiente sira kada loron hahán antes konsumu ai-moruk hanesan dadeer matabisu oras 06:00, merenda dadeer tuku 09:00, meudia oras 12:00, lorokraik merenda oras 18:00 no kalan tarde liu tuku 20:00.
“Ami kontinua fó atensaun liuhusi diresaun apoia diagnóstiku terapia ne’ebé haree ba ai-moruk no nutrisaun entaun kada-loron akompaña ai-han ne’ebé oferese ba pasiente sira,” Claudino akresenta.
Entretantu, antes ne’e Gabinete Étika Deontolójika no Garantia Qualidade (GEDGQ) Ministériu Saúde hala’o vizita ba HoREX Baukau, iha loron Kuarta, 08 Marsu ho objetivu observa direta situasaun iha ospital refere, iha-ne’ebé deteta kompañia fornesedór la kumpri tuir menu ai-han ne’ebè prepara husi nutrisionista iha HoREX Baukau.
Jornalista: Natalino Belo
Editór: Evaristo Soares Martins
