DILI, 27 Setembru 2023 (TATOLI) – Grupu investór, hosi setór privadu no Governu Malázia, realiza enkontru ho Prezidente Repúblika, José Ramos-Horta hodi ko’alia kona-ba Malazia nia prontidaun atu investe iha Timor-Leste iha kualker área.
“Ha’u no maluk sira seluk hanesan investór sira no negosiante hosi setór privadu no Governu, mak mai hosi Malázia, hasoru malu ho Prezidente Repúblika ho objetivu atu kondús liután relasaun negósiu no investimentu hosi Malázia ba Timór-Leste. Ami prontu atu investe iha ne’e, maibé ami sei halo estudu kona-ba potensiál saida mak nasaun ne’e iha, iha área saida de’it ami bele”, Investór hosi Malázia, Tian Chua, dehan ba jornalista sira iha Palásiu Prezidensiál, segunda ne’e.
Nia esplika, investór sira hakarak investe iha Timor-Leste, hanesan iha setór formasaun atu aumenta abilidade timoroan sira nian atu iha koñesimentu klean atu bele simu investór barak liután mai nasaun ne’e.
Iha Área saúde, Malazia mós hakarak halo investiemntu no konstrui Ospitál ho kategoria internasionál atu redús lori pasiente ba halo tratamentu iha rai liur.
“Iha tinan ida-ne’e, ami sei prepara investór sira no kooperasaun sira depende ba Governu. Ami hein iha tinan ida oin bele realiza kooperasaun ne’e tanba oras ne’e sei iha planu”, nia hatete.
Iha área agrikultura, Malazia mós hakarak investe tanba maioria Timor-Leste nia populasaun moris ho vida agrikultór, nune’e bele redúz produtu ne’ebé importa hosi rai liur.
“Ami mós hakarak investe iha agrikultura, tanba Timor-Leste iha potensiál ba agrikultura, ida ne’e dalan ida mós atu hatún númeru importasaun liuliu ba produtu sira ne’ebé ita bele prodús de’it iha ne’e” ,nia konklui.
Jornalista: Hortencio Sanche
Editór : Zezito Silva
