COVALIMA, 02 outubru 2023 (TATOLI)—Diretora Servisu Saúde Munisípiu Covalima, Maria Fátima Moniz, hateten hahú fulan-Janeiru to’o fulan-agostu 2023 ne’e, Saúde Covalima rejista pasiénte moras Tuberkuloze (TBC) hamutuk na’in-102.
“Hahú fulan-janeiru to’o fulan-agustu tinan ne’e,ita rejista pasiénte ne’ebé sofre moras tuberkuluze hamutuk 102 ne’ebé mai hosi sentru saúde hitu iha munisípiu Covalima,” Maria Fátima Moniz hateten ba Agência Tatoli, iha nia servisu Camnasa, sesgunda-ne’e
Servisu saúde Covalima rejista pasiénte moras Tuberkuloze hamutuk 102 hosi númeru ne’e pasiénte na’in-100 ativa halo tratamentu iha sentru saúde loo-rloron fó aimoruk, nune’e pasiénte bele hemu aimoruk ho rútina no na’in-rua mate tanba pasiénte tarde halo tratamentu.
Pasiénte pozitivu moras Tuberkuloze na’in-100 mai hosi sentru saúde sira hanesan Sentru Saúde Fatululik, Fatumea, Tilomar, Maucatar, Fohorem, Suai no postu administrativu Zumalai, munisípiu Covalima.
Tuir dadus ne’ebé servisu saúde Covalima rejista, pasiénte pozitivu moras tuberkuloze na’in-100 ne’ebé ativu halo tratamentu mai hosi postu administrativu maibé pasiénte sira barak hoi postu administrativu Suai, Maucatar, Zumalai no Tilomar.
“Ha’u la lembra pasiénte pozitivu moras Tuberkuloze ne’ebé hanesan barak hosi postu Suai Maucatar, Zumalai no Tilomar kada sentru saúde númeru hira tuir relatóriu ne’ebé ha’u simu ne’e pasiente hamutuk 102 ne’ebé na’in-rua mate,” nia dehan.
Atu halo prevensaun ba moras Tuberkuloze, Servisu Saúde Munisípiu Covalima liuhosi pesoál saúde sira nafatin alerta foin lalais hala’o ona lansamentu kompromisu ne’ebé fó sai hosi eis Primeiru-Ministru Taur Matan Ruak iha tinan 2025 atu hapara moras Tuberkuloze.
“Iha loron 21 setembru 2023, ita mós hala’o ona lansamentu komentu atu hapara moras Tuberkuloze iha munísipiu Covalima,” nia hateten.
Ho nune’e, estratéjia ne’ebé pesoál saúde sira halo atu hapara moras TBC, xefe sentru saúde ho responsavél ba moras TBC hodi halo screening ba pasiente ne’ebé hala’o konsulta bainhira mear semana rua liu, halo teste ba pasiénte sira-nia kabeen tasak atu identifika nia sofre moras TBC ka la’e.
Molok atu hala’o konsulta ba pasiénte sira responsabel promosaun fó sai uluk informasaun bainhira pasiénte sé de’it moras TBC tenke hakat ba sentru saúde atu hala’o konsulta.
Pasiénte na’in-100 moras TBC pesoál saúde sira identifika balun bainhira hala’o konsulta iha sentru saúde no balun pesoál saúde-sira identifika bainhira hala’o vizita uma ho programa saúde ba família.
Iha vizita programa saúde ba família ne’e, bainhira pesoál saúde identifika membru família moras TBC foti sampel hala’o teste pozitivu, entaun sei fó aimoruk prevensaun TBC membru família sira seluk.
Entertantu, tuir dadus Governu liuhosi Ministériu saude estabelese ona sentru saúde hitu ne’ebé estabelese sei postu administrativu hitu ho nia postu saúde hamutuk 24.
Jornalista : Celestina Teles
Editór : Cancio Ximenes
