DILI, 25 Marsu 2026 (TATOLI)–Asistente Treinadór Selesaun Nasionál Futsál Timor-Leste, Nelcen Escurial da Silva, kuarta ne’e, iha edifisiu Federasaun Futeból Timor-Leste (FFTL) anunsiu ona jogadór hamutuk na’in-14 ne’ebé selesionadu ba Selesaun Nasionál ne’ebé preparadu atu ba kompete iha jogu ASEAN Futsál Championship, ne’ebé sei realiza fulan-Abríl tinan ne’e iha Tailándia.
“Ita halo ona selesaun ba jogadór hamutuk na’in-14, sira ne’e mak sei reprezenta Timor-Leste ba joga iha ASEAN Futsal Championship no ita-nia preparasaun másimu ona,” Treinadór ne’e hateten liuhusi konferensia imprensa.
Nia dehan, jogadór hirak ne’e foti husi klube sira-ne’ebé durante ne’e kompete iha Liga Futsál Timor-Leste, tanba nia iha konfiansa katak jogadór sir-ne’ea sei hatudu rezultadu di’ak.
Iha fatin hanesan, Diretór Selesaun Nasionál FFTL, João Maneco, reforsa tan katak Timor-Leste nia grupu todan uitoan maibé FFTL tau konfiansa ba Treinadór, Asistente Treinadór no jogadór sira hodi hala’o jogu ho di’ak.
“Ita hatene katak jogu ne’e ita monu iha grupu ne’ebé todan uitoan mak ita sei hasoru Tailándia, Myanmar, Vietname, maibé tau konfiansa ba ekipa,” Maneco hateten.
Nia dehan, Selesaun Nasionál Futsál sei aranka ba Thailandia iha 04 fulan-Abríl tinan 2026 ne’e.
Nia hatutan, Diresaun Selesaun Nasionál FFTL orienta ekipa ne’e hala’o preparasaun durante semana rua (2) ona no fiar katak hela loron hira sei halo preparasaun di’ak liutan.
Iha sorin seluk, Jerente ekipa Selesaun Nasionál Futsál Timor-Leste, Farão Belo Ung, hateten maske ekipa Timor-Leste hasoru nasaun jigante lubuk ida iha jogu ne’e, maibé sei esforsu atu hatudu jogu ne’ebé di’ak.
“Ita-nia ekipa hasoru nasaun ne’ebé forte uitoan iha ASEAN, maibé ita fiar katak ita-nia jogadór sira sei hala’o jogu ne’ebé di’ak. Jogu durante loron tolu mak termina ita manán ou lakon iha faze apuramentu grupu nian,” Farão dehan.
Antes ne’e, Assosiasaun Futsál Timor-Leste (AFTL) kolabora ho FFTL, hili Efraim Ferdinand Bawole nu’udar Treinador Prinsipál Selesaun Nasional Futsál Timor-Leste ba kompetisaun ASEAN Futsal Championship 2026.
Kompetisaun ne’e sei realiza iha Nonthaburi, Tailándia, husi loron 05-12 fulan-Abríl 2026, no Selesaun Nasional Futsál TL okupa iha Grupu A hamutuk ho nasaun ASEAN seluk mak hanesan, Tailándia, Vietname no Myanmar.
Lista jogadór
Jogadór selesaun nasionál hamutuk na’in-14 ne’e mak hanesan; Domingos dos Santos husi klube Ramelau Fc, Neodinho Guterres husi Fc Coelho, Rivaldo Ribeiro husi Ramelau Fc, Eufrasio Soares husi Caesar Dante, Natalizio Sang husi Ramelau Fc, Aristides Pires husi Fc Coelho.
António da Silva husi Mauputar Fc, João Paul husi Ramelau Fc, Joel Fernandes husi Ramelau Fc, Bendito Ramos husi Mauputar Fc, Miguel Fernandes husi Coelho Fc, Leonildo Torres husi Caesar Dante Fc, Evinho Guterres husi Ramelau Fc, Ruben Faria husi Mauputar Fc.
Jornalista : Hortencio Sanchez
Editór : Cancio Ximenes
