DILI, 18 setembru 2023 (TATOLI)—Diretór Nasionál Promosaun Direitu ba Ema ho Defisiénsia (DNPDED), Mateus da Silva, hateten atualizasaun rejistu benefisiáriu Bolsa da Mãe Jerasaun Foun iha fulan-jullu tinan ne’e hamutuk 47.639.
Notísia Relevante: MSSI rejista ona aplikante “bolsa da mãe jerasaun foun” 43.137
“Atualizasaun rejistu ba bolsa da mãe jerasaun foun iha fulan jullu 2023, inan isin-rua hamutuk 8.174, labarik ho idade 0-6 hamutuk 39.288, labarik no ema ho defisiénsia (EhD) iha 177,” nia dehan ba Tatoli, iha Suai Room, Dili, foin lalais ne’e.
Nia hateten, atividade ida-ne’e halo parseria ho instituisaun solidariedade sosiál (ISS) iha munisípiu sira no nia atijimentu mak finaliza ona prosesu orsamentu apoiu fundu transferénsia ba ISS.
“Nia osan mak $356,606,68. Agora, nia atinjimentu ita asina ona akordu hodi transfere osan ba konta instituisaun nian,” nia dehan.
Benefisiáriu Bolsa da Mãe Jerasayn Foun hamutuk 40,957 hetan ona pagamentu hosi MSSI ne’ebé servisu hamutuk ho Ajénsia Mosan Telemor no T-Pay Telkomcel, iha munisípiu hitu (7), kompostu hosi Ainaro, Bobonaro, Covalima, Liquça, Manatuto, Viqueque, Rejiaun Administrativa Espesiál Oé-Cusse Ambeno (RAEOA) ba fulan-abríl to’o juñu 2023.
Totál benefisiáriu 40,957 ne’e kompostu hosi inan isin-rua hamutuk 3,998, labarik ho idade 0-6 hamutuk 36,829, labarik ho defisiénsia hamutuk 130 ho nia orsamentu ne’ebé iha ona ajénsia pagamentu Mosan ho T-Pay hamutuk $2,735,350.
Daudaun ne’e, MSSI prosesa tan ona pagamentu bolsa da mãe jerasaun foun ba fulan-jullu nian ho totál benefisiáriu hamutuk 44,026 ne’ebe kompostu hosi inan isin-rua hamuutk 4.110, labarik idade 0-6 hamutuk 39,779, labarik ho defisiénsia hamutuk 137, ho nia orsamentu $900,435.
Nune’e, nia dehan, totál orsamentu ba fulan haat hosi abríl to’o jullu hamutuk $3,635,785, no orsamentu tinan 2023 ne’ebé ezekuta ona ba programa bols ada mãe jerasaun foun hahú hosi fulan-janeiru to’o jullu ne’e hamutuk $5,362,040.
To’o iha 31 agustu 2023 liubá, benefisiáriu hamutuk 53,512 mak rejistradu ona, ne’ebé kompostu hosi inan isin-rua hamutuk 9,601, labarik hamutuk 43,413, labarik ho defisiensia hamutuk 198.
Hosi totál benefisiáriu ne’ebé rejistradu ona no hetan aprovadu hosi MSSI hamutuk 51,326 ne’ebé kompostu hosi inan isin-rua hamutuk 9037, labarik idade 0-6 hamutuk 42,104, labarik ho defisiensia hamutuk 185.
Diretór Jerál Ministériu Solidariedade Sosiál no Inkluzaun (MSSI), Florêncio Pina Dias Gonzaga, hateten tinan oin Governu kontinua estende programa bolsa da mãe jerasaun foun ba munisípiu haat seluk ne’ebé seidauk implementa eseptu Dili ho Ataúro mak implementa iha tinan 2025.
“Programa Bolsa da Mãe Jerasaun Foun iha IX Governu ida-ne’e ita iha alokasaun orsamentu ba tinan oin no tuir informasaun hosi polítika-na’in katak kontinua estende tan ba munisípiu haat seluk no ikus mak Dili ho Ataúro. Ami hanesan tékniku la’o tuir dekretu-lei ne’ebé guia programa ne’e,” nia dehan.
Nia hateten, parte tékniku la’o tuit de’it polítika Governu ida-ne’e nian maibé bainhira mosu desizaun ida katak estende dala ida entaun la’o tuir de’it.
“Ita garante no ko’alia nune’e tanba bazeia dekretu-lei Programa bolsa da Mãe jerasaun foun mak programa asisténsia sosiál ne’ebé estabelese ho dekretu – lei númeru 22/2021 , 10 novembru , no programa ne’e hahú ona iha munisipiu Ainaro , Bobonaro no RAEOA iha tinan 2022 . Ho nune’e , iha tinan ne’e, Governu liuhosi MSSI hala’o pagamentu faze daruak iha munisípiu Liquiça , Manatuto , Viqueque no Covalima no kontinua to’o 2025,” nia hateten.
Notísia Relevante: Governu konklui pagamentu bolsa da mãe jerasaun foun iha Oé-Cusse
Jornalista : Osória Marques
Editór : Cancio Ximenes
