BAUCAU, 07 marsu 2023 (TATOLI) – Kargu xefia sira hosi munisípiu Baucau tersa ne’e, hamutuk na’in-50 resin tuir formasaun kona-bá igualdade jéneru hosi Sekretaria Estadu Igualdade Jéneru no Inkluzaun (SEII).
Diretora Nasionál Planeamentu no Avaliasaun Ministériu Admistrasaun Estatal (MAE), Olavia Marques, esplika, programa refere realiza tanba serbisu hamutuk entre MAE ho
SEII relasiona ho programa VIII governu kona-ba abordajen integradu jéneru, igualdade no inkluzaun sosiál ne’ebé previstu iha Konstituisaun Repúblika Demikratika Timor-Leste artigu 17 hateten ema hotu iha direitu hanesan asesu ba parte hotu.
“Ministériu Admistrasaun Estatál hakarak atu asegura implementasaun programa la’o ho di’ak, ita estabelese ema sira iha nasionál no munisípiu,”Diretora Nasionál Planeamentu no Avaliasaun hosi Ministériu Administrasaun Estatál hateten iha Vila Nova.
Formasaun refere realiza atu kapasita kargu xefia sira liuliu oinsá hasa’e koñesimentu kona-bá igualdade jéneru iha fatin serbisu.
Objetivu hosi formasaun ne’ebé hala’o durante loron-haat atu ajuda autoridade munisípiu halo advokasia kona-bá asuntu jéneru nune’e bainhira halo rekrutamentu ba funsionáriu fó prioridade mós ba feto sira.
“Ita-nia esperansa ba oin iha Baukau númeru feto aumenta asume kargu xefia sira, maibé haree ba kapasidade,” Olavia Marque akresenta.
Formadór atuál Xefe Departamentu Abordajen Integradu Jéneru hosi Sekretáriu Estadu Igualdade no Inkluzaun Sosiál, Hermínio Xavier, hateten, matéria inportante mak igualdade jéneru inkluzaun sosiál siensivel katak, tenke konsidera feto ho mane, ema ho defisiénsia.
“Tempu ona konvense superiór sira atu fó espasu ba feto hodi lidera depois mak ita avalia,” Hermínio Xavier argumenta.
Munisípiu Baucau atualmente kargu xefia no diretór serbisu munisipál hamutuk na’in-56 ne’ebé feto na’in-11 no mane na’in-45.
Jornalista : Natalino Belo
Editór : Evaristo Soares Martins
