VIQUEQUE, 22 abríl 2024 (TATOLI)—Membru Asembleia Konsellu Konsultivu Munisipál (KKM) Viqueque liuhusi prosesu votasaun, segunda ne’e, aprova proposta programa investimentu hamutuk 45 ba tinan 2025 nian.
Asembleia KKM lidera hosi Prezidente Autoridade munisípiu Viqueque (PAM), Francisco Cruz S. de G Soares no akompaña hosi Sekretáriu Asuntu Dezenvolviemntu no Sekretáriu Administrasaun Finansa, ne’ebé iha sesaun votasaun partisipa hosi membru KKM hamutuk na’in-39, ho rezultadu votasaun afavór 37, kontra 0 no abstensaun 2.
Autoridade munisipál relata, programa hirak ne’e rekolla husi aldeia, suku no postu, hafoin asembleia munisipál halo votasaun finál.
“Votasaun ne’e ita vota pakote ba programa hamutuk 45 ne’e nesesita ba povu Viqueque no programa sira-ne’e, ne’ebé antes ne’e Konsellu Asembleia sira aprova uluk proposta no agora ita halo apresiasaun ba programa tinan oin. Nune’e, ohin maioria membru fó votu afavór, signifika sira tau duni interrese ba munisípiu Viqueque,” PAM Francisco Cruz, hateten durante atividade, iha salaun Administrasaun munisipál.
Asembleia halo ona votasaun ba programa prioridade munisípiu Viqueque ne’ebé la haree ba kor maibé hamutuk hodi hadi’a no lori munisípiu ba oin liuhusi programa sira-ne’ebé define ona.
“Tanba ita-nia tempu mós la’o daudaun liuhusi Asembleia ida-ne’e, inspira ita hotu hodi hanoin atu hadi’a Viqueque. Nune’e mós, ha’u agradese ba membru ne’ebé fó votu afavór,” nia tenik.
Notísia relevante : KKM Viqueque define programa prioridade 12 foku ba setór saúde no agrikultura
Iha fatin hanesan, Xefe suku Bibileo, Moises A. de C. Pinto, haktuir, votasaun ne’e diretu demokrasia ne’ebé fó liberdade ba membru sira atu fó votu depende ba ida-idak ninia preferénsia.
“Ha’u ohin fó kartaun abstensaun tanba la’ós lakohi aprova programa dezenvolvimentu, maibé iha programa balun maka ha’u la aseita tanba la nesesáriu ba povu, liu-liu programa reabilitasaun merkadu Olobai Viqueque Vila ne’ebé gasta osan ema la uza no sai abandona. Enkuantu ba programa 44 de’it maka pertinente ba povu Viqueque. Tanba ne’e maka ha’u vota abstensaun, Asebleia labele tau interrese ba laran maibé tenke luta ba rai no povu ida-ne’e,” nia konta tuir.
Tuir planu programa ne’e sei ba aprezenta iha Ministériu Administrasaun Estatal (MAE) no sei kontinua aprezenta durante sorumutuk Konsultivu Dezenvolvimentu Nasionál hodi tetu programa prioridade sira-ne’ebé munisípiu halo ona apresiasaun.
Asembleia KKM kompostu husi Prezidente Autoridade, Sekretáriu munisípiu, Xefe suku 36, Relijiozu, Sosiadade sivil, juventude feto no mane, partidu polítiku sira-ne’ebé hetan asentu iha Parlamentu Nasionál, no veteranu, ho membru efetivu na’in-57, maibé ba atividade apresesiasaun programa ba tinan 2025 iha membru na’in-39 maka partisipa.
Jornalista : Vitorino Lopes da Costa
Editora : Julia Chatarina
