DILI, 22 maiu 2024 (TATOLI)- Governu liuhusi desizaun Konsellu Ministru aprova proposta Vise-Primeiru-Ministru nian, ne’ebé nu’udar Ministru Turizmu no Ambiente, hodi nomeia Fausto Soares Dias ba kargu Diretór Ezekutivu Servisu Rejistu no Verifikasaun Emprezariál, Institutu Públiku (SERVE,I.P) hodi substitui Florêncio da Conceição Sanches, ne’ebé ninian mandatu termina ona no nomeia Augusta Gomes ba kargu Vise-Diretora Ezekutiva.
Alende ne’e, KM mós nomeia mós Maximiano Gusmão Oliveira ba kargu Prezidente Autoridade Nasionál ba Lisensiamentu Ambientál, Institutu Públiku (ANLA,I.P).
“Konsellu Ministru nomeia Maximiano hodi substitui António Lelo-Taci ne’ebé hetan ezonerasaun husi ninia knaar, antes ne’e,” katak iha nota ne’ebé Agência TATOLI asesu, kuarta ne’e.
Alende ne’e, Konsellu Ministrus delibera mós, liuhusi proposta Vise-Primeiru-Ministru, ne’ebé nu’udar Ministru Turizmu no Ambiente, hodi nomeia Felizberto Araújo Duarte Tony ba kargu Prezidente Autoridade Nasionál Dezignada ba Kombate Alterasaun Klimátika (ANDKAK) Institutu Públiku (IP), hodi troka Pedro dos Santos Marçal da Costa ne’ebé hetan mós ezonerasaun husi ninia kna’ar antes ne’e.
Entertantu, iha proposta Vise-Primeiru-Ministru, ne’ebé nu’udar Ministru Koordenadór Asuntu Ekonómiku, mós hetan aprovasaun husi Konsellu Ministru hodi aprova ka nomeia Abílio Immanuel Almeida Barros ba kargu Diretór Ezekutivu Institutu Peskiza, Dezenvolvimentu, Formasaun no Promosaun Bambu, I.P., tanba fatin ne’e mamuk hela.
Notísia relevante: Governu aprova millaun $4 apoia vitíma inundasaun iha Brazíl
Jornalista: Hortencio Sanchez
Editór:Florencio Miranda Ximenes
