DILI, 03 agostu 2023 (TATOLI)—Inistitutu Apoiu Dezenvolviventu Emprezariál, (IADE) sei fó sai manán-na’in ba kompetisaun Planu Negósiu Inovativu 2023 iha área pekuária nian.
Diretór Ezekutivu IADE, Filomeno Marcelino Belo, informa, joven timor-oan hamutuk 589 rejistadu partisipa iha Planu Negósiu Inovativu tinan ne’e, ne’ebé hosi númeru ne’e ekipa juri halo selesaun no ikus mai sai partisipante 310 mak aprezenta planu negósiu.
“Hela semana ida tan partisipante sira tenke aprezenta ona sira-nia planu negósiu ba juri sira iha treinamentu planu negósiu, liuhosi ida-ne’e mak juri sira haree hodi tais ikus mai tenke iha ema na’in-10 mak sai manán-na’in, ne’ebé rezultadu ikus ita sei fó sai iha outubru 2023,” Filomeno Marcelino Belo, hateten liuhosi programa entrevista eskluziva live streaming ne’ebé hala’o iha estúdiu Agência Tatoli, Farol, kinta ne’e.
Notísia relevante : MKAE halo lansamentu kompetisaun PNI 2023 iha área pekuária
Nia hateten, partisipante selesionadu sei aprezenta planu negósiu dala-ida iha munisípiu sira, ne’ebé daudaun ne’e ekipa téknika hosi IADE prepara hela atu aloka juri sira ba munisípiu hotu.
Governu aloka orsamentu $1.227.678 tinan ne’e, ba programa Planu Negósiu Inovativu 2023 $310.000, aleinde koopera ho parseiru sira seluk hanesan Timor Plaza, Timor Telecom, no empreza Santos ne’ebé iha interese apoia joven sira, no kada tinan apoia orsamrntu ba IADE ba kustu operasionál.
“Tinan ne’e, ita-nia partisipante sira ne’ebé sai manán-na’in tama iha top 10 ka manán-na’in ema na’in-10 ne’e sei hetan apoia fundu oituan hosi IADE ho montante ne’ebé la hanesan, boot liu hahú hosi $5.000 to’o $7.000 no kiik liu hetan $1.000,” Diretór institutu relata.
Dezafiu ne’ebé durante IADE hasoru mak orsamentu tanba programa ne’e realiza iha territóriu tomak maibé orsamentu menus, inklui menus rekursu umanu kualifikadu iha área negósiu inovativu, tanba nesesidade ne’ebé presiza ne’e boot liu maibé ema menus.
“Ho dezafiu sira ne’ebé iha, ami nafatin kontinua esforsu apoia ita-nia joven sira no sira ne’ebé iha sempre mai ho inovativu iha área oin-oin,” nia orgullu.
Jornalista : Arminda Fonseca
Editora : Julia Chatarina
