DILI, 05 Novembru 2025 (TATOLI)—Konstrusaun ospitál militár ne’ebé husi doasaun Governu Xina, daudaun ne’e iha faze dezeñu finál.
“Daudaun ne’e iha prosesu dezeñu no ba konsesaun dezeñu finál ona. Ita espera katak tinan ida ka rua bele konklui konstrusaun ne’e,” Ministru Defeza Kontra Alimirante Donaciano do Rosário da Costa Gomes ‘Pedro Klamar Fuik’ hateten ba Jornalista sira hafoin partisipa iha aprezentasaun no debate ba Orsamentu Jerál Estadu (OJE) OJE 2026 iha faze jeneralidade ba loron dahuluk nian, iha Sala Plenária Parlamentu Nasionál, Kuarta ne’e.
Governante ne’e esplika, maski foin daudaun iha ámbitu komemorasaun loron FALINTIL ba dala-50 Governu Timor-Leste liuhusi Ministériu Defeza no Embaixada Xina formaliza ona akordu kooperasaun ba konstrusaunn óspitál militár andar 10 ne’ébé konstrui iha terrenu Kuartel FALINTIL-Forsa Defeza Timor-Leste (F-FDTL) nian, maibé prosesu ne’e seidauk la’o tanba daudaun husi Governu Xina sei halo hela dezeñu.
Notísia relevante : Governu TL-Xina formaliza akordu ba konstrusaun ospitál militár
Enkuantu, Governu Timor-Leste hein de’it husi Governu Xina kona-ba hatuur fatuk dahuluk ba konstrusaun ospitál militár ne’e.
“Kona-ba lansamentu ne’e hein de’it depois maka imi haree. Tanba ne’e Dosaun no konseitu dezeñu ne’e sira mak sei prepara. Tanba ne’e ita hein de’it,” nia akresenta.
Jornalista : Natalino Costa
Editora : Julia Chatarina
