DILI, 27 Marsu 2026 (TATOLI)–Koordenadór eskola Ensinu Báziku Filiál (EBF) Aldeia Furaklau, Suku Aitemua, Postu Administrativu Turiskai, Munisípiu Manufahi, Amaral da Costa Barreto, husu ba Ministériu Edukasaun (ME) atu koloka profesór iha eskola referida.
“Ami-nia eskola ne’e, ha’u mak hanesan Koordenadór, ami-nia problema mak menus tebes Profesór. Iha ne’e, ami na’in-tolu de’it mak hanorin iha eskola ne’e, ami hanorin klase primeiru anu to’o sestu anu, ida-ne’e mak ami nia problema ne’ebé ami hasoru,” Koordenadór ne’e hateten ba Agência TATOLI liuhusi telefónika, ohin.
Nia dehan, foin lalais ME koloka Profesór foun ba eskola hotu kada munisípiu no eskola refere hetan kolokasaun profesór na’in-rua (2) maibé la konsege hanorin iha eskola ne’e.
“Kolokasaun Profesór foun sira husi Ministériu Edukasaun iha faze primeiru Profesór ida (1) mak mai, maibé nia naran mak mai maibé isin-lolon la mai ate agora. Kolokasaun segundu, professor ida (1) mai duni maibé tanba moras halo transferénsia tiha ba Filiál ida iha Aitemua nian, entaun ami susar tebes ba professor. Hahú kedan 2008 to’o agora, ami na’in-tolu (3) de’it mak hanorin iha ne’e,” nia dehan.
Husi preokupasaun hirak ne’e, nudar Koordenadór hato’o ona pedidu ba Servisu Edukasaun Munisípiu maibé la hetan resposta to’o ohin loron.
“Ha’u hato’o beibeik ona ami-nia preokupasaun ne’e ba Edukasaun Munisípiu maibé sira resposta katak, ami labele halo buat ida, buat hotu desizaun mai husi nasionál. Ita hein auguenta tan lai. Ida-ne’e mak iha oportunidade ne’e, ha’u husu ba Ministériu Edukasaun bele haree ami-nia preokupasaun ne’e, ami presiza tan profesór na’in-haat (4) hanesan ne’e sufisiente ona,” nia hateten.
Tuir dadus ne’ebé iha, totál alunu iha eskola ne’e hamutuk 118 no kondisaun eskola ho fasilidade sira ho kondisaun di’ak hotu no programa merenda eskolár la’o normál maibé problema mak menus profesór.
Jornalista : Hortencio Sanchez
Editór : Cancio Ximenes
