DILI, 30 Maiu 2025 (TATOLI)—Ministra Edukasaun, Dulce de Jesus Soares, informa Lei Baze Edukasaun, diskutida iha Komisaun G Parlamentu Nasionál ba Asuntu Edukasaun.
Nia haktuir, lei referida antes ne’e promulgadu iha 2008, kompostu husi Lei Pre-eskolár to’o iha Ensinu Superiór.
Maibé, Dulce esplika, iha tinan 2024, husi parte ensinu superiór halo ona Lei Baze Edukasaun ketak ida ba ensinu superiór de’it, entaun, signifika Lei Baze Edukasaun orijen ne’e sei nafatin hamutuk ho artigu sira-ne’ebé mak relavante ba ensinu superiór.
“Entaun, Komisaun G husi Parlamentu Nasionál halo projetu-lei ida-ne’ebé halo alterasaun ba konteúdu Lei Baze Edukasaun ne’e. Depois, ami simu projetu-lei ne’e, ami rasik fó pontu devista ba iha alterasaun liuhusi proposta ba Komisaun G,” Ministra Edukasaun dehan ba Tatoli, iha Lesidere, sesta ne’e.
Dulce informa katak Ministériu Edukasaun lori ona projetu-lei ne’e hodi aprezenta ba Konsellu Ministru atu hetan filafali apresiasaun, nune’e bele hakat bá iha konsultasaun públika no mós iha espesialidade ne’ebé Komisaun G mak sei hamutuk ho Ministériu Edukasaun no entidade relevante hotu iha área edukasaun atu halo diskusaun kona-ba asuntu referidu.
“Maibé, agora sei iha prosesu laran. Diskusaun jeneralidade ami halo, maibé seidauk iha diskusaun espesialidade ho entidade kompozisaun sira hotu, tanba projetu-lei ne’e maihusi Komisaun G,” nia konklui.
Jornalista: Osória Marques
Editór: Xisto Freitas da Piedade
