DILI, 24 Novembru 2025 (TATOLI)-Timor-Leste sei komemora Loron Proklamasaun Independénsia Unilaterál 28 Novembru 19975-28 Novembru 2025 ba da-50. Selebrasaun ne’e nu’udar momentu reflesaun ba timoroan hotu atu hateke ba oin hodi kontribui liután ba dezenvolvimentu país.
Xefe bankada Partidu Kongresu Nasionál Rekonstrusaun Timorense (CNRT, sigla portugés), Patrocínio dos Reis Fernandes, hateten momentu ida ne’e ba timoroan hotu atu reflete indepedénsia ne’ebé ohin loron karun, tanba hodi ema besik rihun 300 nia vida mak sosa.
“Ita hotu hakarak kontinua sira-nia mehi kona-ba liafuan xave rua, liberta pátria no liberta povu. Ohin, ita hotu la’o dook ona, ita hateke ba oin, buka atu kontribui nu’udar sidadaun iha idaidak nia knaar saida de’it. Buat hotu hanoin katak independénsia ne’e, liuliu jerasaun tuan sira fó sira-nia isin hodi sosa, ita tenke fó valór”, nia hateten iha Parlamentu Nasionál, ohin.
Hodi fó apelu ba sidadaun hotu presiza hateke ba futuru atu kontribui iha idaidak nia papél ba hametin estabilidade no pás. Nune’e, fó fiar ba Ezekutivu hala’o serbisu sira lori dezenvolvimentu atu atinje objetivu mak hasai povu husi ki’ak.
“Ha’u kontribui no halo ona saida hodi ita hotu bele la’o hamutuk? Fó duni folin ba sira ne’ebé mate ba independénsia?”, nia haktenik.
Vise Bankada Partidu Frente Revolusionária Timor-Leste Independente (FRETILIN), David Dias Ximenes ‘Mandati’, dehan uluk manán funu tanba hamutuk. Nune’e hodi apela atu timoroan hotu hamutuk lori dezenvolvimentu ba oin, tanba ne’e diferensa ne’ebé iha atu dinamiza hanoin hodi dinamiza mós asaun, maibé la’ós diferansa sai fali ódiu malu.
Nia husu ba Governu atu tau atensaun hodi mellora setór saúde, edukasaun, bee-moos, estrada, nune’e lori dezenvolvimentu ba povu.
Atu marka data istóriku ida-ne’e, Governu selebra, iha loron 24 Novembru, ho abertura ba Espozisaun Dezenvolvimentu Governasaun Lokál, iha Tasi-Tolu, to’o 29 Novembru.
Iha dadeer 27 Novembru, sei iha misa agradesimentu, ne’ebé selebra iha Igreja Katedrál Nossa Senhora da Imaculada Conceição. Hafoin misa sei tau ai-funan ba erói pátria iha monumentu Nossa Senhora da Imaculada Conceição – Lesidere.
Iha 28, serimónia hasa’e no hatún badeira iha Palásiu Governu, Dili. Iha 29, antes abertura espozisaun “O Rosto da Proclamação e a Alma da Resistência” sei hahú ho selebrasaun eukarístika, iha Igreja Balide, hafoin ida-ne’e mak halo abertura espozisaun, iha Arkivu no Muzeu Rezisténsia Timorense.
Jornalista: Nelson de Sousa
Editora: Maria Auxiliadora
