KOVALIMA, 11 Dezembru 2025 (TATOLI)- Ministru Administrasaun Estatál (MAE), Tomas do Rosário Cabral, kinta-ne’e, akompaña husi Vise-Ministru Justisa, Sekretáriu Estadu Dezenvolvimentu Lokál, Sekretáriu Estadu Asuntu Toponímia no Urbanizasaun (SEATOU) hamutuk ho Autoridade Kovalima hala’o inagurasaun sentru atendimentu balkaun úniku iha Kovalima.
Molok hahú serimónia inagurasaun sentru balkaun úniku, lia-nain sira husi Suku Suai-Loro, Postu Administrativu Suai-Kovalima simu membru Governu, ne’ebé akompaña husi Autoridade Kovalima ho lia dadolin tuir kultura Suku Suai-Loro.
Biban ne’e, Ministru Administrasaun Estatál Tomas do Rosário Cabral, dehan sentru balkaun úniku ne’e atu uza halo atendimentu ho urjénsia ba sidadaun sira.
“Fatin ida-ne’e, ita-boot sira tenke kuidadu tanba balkaun úniku (BU) maka sei fó atendimentu servisu besik ba komunidade ho fasil no lais liután. Hanesan tratamentu dokumentu Passaporte, Billete Identidade (BI), rejistu kriminál no seluk tan iha munisípiu Kovalima”, Governante ne’e hato’o liuhusi nia diskursu iha Kovalima.
Governante ne’e dehan fatin ne’e sai sentru atu halo atendimentu ba dokumentu Estadu ni’an tenke kuidadu, la’ós foin inaugura no foin mak funsiona aat fila-fali.
Ministru Administrasaun Estatál (MAE) Tomas do Rosario Cabral , kinta-ne’e entrega kareta ida no motorizada-ida ba koordenadór Balkaun Úniku (BU), iha munisípiu Kovalima.
MAE entrega transporte ba funsionáriu
Alende ne’e, MAE entrega transporte hanesan karreta ho motorizada ba funsionáriu sira atu fasilita servisu hodi halo atendimentu ba komunidade sira.
“Karreta no motorizada ne’ebé entrega la’os uza lori ba Dili, uza lori ba Dili bainhira husi nasionál presiza. Tanba transporte hanesan karreta no motorizada ne’ebé maka entrega atu fasilita hodi hala’o servisu liuliu halo atendimentu ba publiku”, katak Ministru Tomas.
MAE entrega transporte hanean karreta ho marka Hilux ho nia xapa mátrikula 08248G ho motorizada ida ho nia xapa mátrikula 4397 G uza atu hodi fasilita servisu atendementu ba públiku liuliu komunidade iha Kovalima.
Iha fatin hanesan, Diretora Jerál Simplikasaun Modernizasaun Administrasaun Lokál, Maria Goretti Marques Belo, halo aprezentasaun kona-bá lansamentu balkaun úniku (BU) iha Kovalima, tanba inisiativa husi Ministériu Administrasaun Estatál liuhosi Diresaun Jerál Simplifilasaun no modernizasaun administrasaun lokál hodi asegura servisu.
“Estabelese balkaun úniku ne’e atu hakbesik prestasaun servisu ba sidadaun, moderniza no simplifika servisu atendimentu públiku ho la’ós no fasil ho promove transparénsia no boa Governasaun ho polítika estadu no Governu”, nia afirma.
Estabelese balkaun úniku tuir Dekretu-Lei númeru 49/2023, 23 Agostu no Dekretu-Lei númeru 3/2025, 22 Janeiru. Balkaun úniku maka hanesan servisu deskonsentradu iha nível lokál hodi fasilita servisu sidadaun-sira ba informasaun ho tipu servisu públiku iha fatin ida hodi bele poupa tempu, kustu no redús burokrasia.
Balkaun ne’e hanesan mekanizmu ida promosaun prosesu desentralizasaun hodi espande tan prestasaun servisu liuliu atendimentu públiku hodi hasa’e transparénsia, satisfasaun no konfiansa ba administrasaun públika.
Tuir dadus balkaun úniku estabelese ona iha munisípiu sira hanesan, Ermera, Aileu, RAEOA, Ainaro, Vikeke, Manu Fahi, Bobonaro,Kovalima.
Notisia relevante:Sistema eletróniku iha Balkaun Úniku Baukau la funsiona
Jornalista : Celestina Teles
Editór : Florencio Miranda Ximenes
