DILI, 15 Setembru 2025 (TATOLI)—Xefe Interina Sentru Saúde Formosa, Juleta Canenas, hateten manifestasaun ne’e ne’ebé mak hala’o husi Estudante Universitáriu Timor-Leste (EUTL) ne’ebé ezije deputadu sira iha Parlamentu Nasionál (PN) atu kansela sosa viatura foun ne’e, rezulta manifestante na’in-haat (4) no ida hetan syku pobtu lima tanba halo anarkizmu.
Motísia Relevante: PNTL husu labele halo anarkizmu, CNRT-PD-KHUNTO kansela sosa Prado
“Ohin dadeer, iha tuku 11h00-resin, iha estudante na’in-haat mak mai tratamentu saúde iha emerjénsia Formosa. Manifestante sira kanek ne’e, iha ema na’in-ida (1) mak hetan suku pontu lima (5) no na’in tolu (3) kanek kmaan. Nune’e, médiku sira halo tiha tratamentu hotu no fó alta kedas,” Juleta Canenas hateten ba jornalista sira iha nia kna’ar fatin, Sentru Saúde Formosa, ohin.
Nia infroma, husi na’in-ida suku pontu lima ne’e mós iha lorokraik ne’e fó alta kedas no ida seluk tau kedas soru tanba sira-nia oin nakukun, tanba arma lakrimozeniu ka gas air mata nakfera iha ulun.
“Husi estudante na’in-haat ne’e iha mane na’in-tolu (3) no feto na’in ida (1). Ida nia kanek suku ne’e iha matan nia okos, parese hetan tuda. Sira seluk ne’e tanba tiru husi gas air mata no nakfera mak ninia su’ar kona sira maibé kanek nee kaman no sira alta hotu ona,” nia informa.
Nia relata, estudante sira-ne’ebé mak kanek ne’e mai husi estudante Universidade de Dili (UNDIL), Universidade Orientál Timor-Lorosae (UNITAL) no Universidade Nacional Timor Lorosae (UNTL).
“Ohin sira mai halo tratamentu ne’e sira uza almamater mak hanesan estudante Universidade de Dili (UNDIL), Universidade Oriental Timor-Lorosae (UNITAL) no Universidade Nacional Timor Lorosa’e (UNTL),” nia esplika.
Nia dehan, husi pasiente na’in-haat (4) ne’e la iha pasiente ida mak halo transferénsia ba Hospitál Nasionál Guido Valadares (HNGV).
Notísia Relevante: CNRT, PD no KHUNTO husu kanselamentu ba sosa viatura foun
Jornalista : Felicidade Ximenes
Editór : Cancio Ximenes
