AINARU, 24 Juñu 2025 (TATOLI)-Ministériu Dezenvolvimentu Rurál no Abitasaun Komunitária (MDRHC, iha portugés) apoia rihun $15 ba grupu pekuáriu Garana, iha aldeia Lailima, suku Kasa, postu administrativu Ainaru Vila, munisípiu Ainaru, hodi haki’ak karau.
Xefe Grupu Garana, Saturlino da Luz, hateten grupu ida-ne’e kompostu husi ema na’in-25, ne’ebé daudaun sira haki’ak karau 25 (inan tolu no restu aman).
“Osan ami hetan husi Ministeriu Dezenvolvimentu Rurál hamutuk rihun $15. Ida-ne’e [atu halo] konstrusaun ba karau fatin, inklui sosa karau ne’ebé kada karau ho folin $350”, Saturlino da Luz hateten iha aldeia Lailima, ohin.
Nia dehan Ministru Agrikultura, Pekuária, Peska no Floresta, Marcos da Cruz, hamutuk ho grupu Veterenáriu sira vizita sira-nia fatin hodi fó vasina ba karau sira ne’e, inklui tara brinkus ba karau nia tilun.
Iha fatin hanesan, Ministru Agrikultura, Pekuária, Peska no Floresta, Marcos da Cruz, hateten animál sira mós presiza kuidadu atu labele moras, entaun tenke fó vasina no tara brinkus ba sira-nia tilun, hanesan atu halo identifikasaun ida ba karau sira ne’e.
“Ita-nia tékniku sira mós mai apoiu grupu ne’e oinsá atu kuda ai-han ba karau sira ne’e hanesan ai-lamtoro, ai-kafé. Ita mós sujere kuda mós ai-turi no seluk tan ne’ebé durante ne’e ita dezenvolve ona iha fatin seluk”, governante ne’e hateten.
Iha biban ne’e ministru husu ba públiku ne’ebé iha karau tenke tau iha luhan, kesi, no fó vasina tanba iha territóriu ekipa Pekuária husi ministériu nian sei fó vasina ba animál sira, inklui fahi, manu no asu.
Jornalista: Arminda Fonseca
Editora: Maria Auxiliadora
