DILI, 26 juñu 2024 (TATOLI)—Ministériu Edukasaun (ME) liuhusi Diresaun Lojístika, iha kinta (27/06) sei distribui karteira eskolár (meza no kadeira) ba Eskola Bázika Sentrál (EBC, sigla portugés) Luro, munisípiu Lautém.
“Ami konfirma ona ba lojístika nasionál katak aban ne’e distribui ona mai. Ne’ebé ida-ne’e mós ami halo ona rekaman tanba ami-nia pedidu ba kleur ona no sásan ne’e la mai to’o agora, maibé ohin ami telefone dehan aban haruka ona mai, ne’ebé ita hein de’it,” Diretór Servisu Edukasaun munisípiu Lautém, Anibal Fernandes, informa ba Agência Tatoli, via telefónika, kuarta ne’e.
Notísia relevante : ME distribui karteira eskolár 8000-resin ba eskola 100-resin iha semana oin
Totál estudante iha EBC Luro ne’e hamutuk 500-resin, enkuantu Ensinu Báziku Sentrál Luro hetan edifísiu foun unidade ida iha tinan 2023. Eskola foun ne’e iha saladeaula hamutuk tolu no kada saladeaula sei prense karteira eskolár 30.
Diretór EBC Luro, Filipe Soares, informa, edifísiu foun unidade ida halo ona maibé seidauk kompleta ho fasilidade sira nune’e to’o agora estudante sira sei tuur de’it iha rai.
“Kona-ba 1⁰ no 2⁰ siklu Ensinu Báziku Sentrál Luro ninian ne’e atu ko’alia katak kondisaun ne’e la favorese, edifísiu halo ona maibé kadeira laiha no estudante sira tuur deit iha simente, nia impaktu ne’e orsida bele moras no difikulta tebes ba prosesu ensinu aprendizajen nian. Tanba ne’e proposta ba mobiliáriu sira ne’e dala barak ona ko’alia fila-fila ona, haruka beibeik ona ba parte kompetente maibé seidauk atende,” nia akresenta.
Diretor Filipe hateten kondisaun la favorável ba estudante sira labele garante nia kualidade, tanba ne’e husu atu oferese fasilidade sira hanesan karteira eskolár.
“Ita-nia esperansa mak eskola atu sai kualidade, kuandu kondisaun la favorese, ita bele ko’alia maibé kualidade ne’e mosu liuhusi ne’ebé. Ha’u nu’udar diretór eskola, situasaun ida-ne’e presiza duni mobiliáriu, husu atu ajuda kadeira sira ne’e atu estudante sira bele tuur hodi hala’o ensinu aprendizajen,” nia katak.
Jornalista : Osória Marques
Editora : Julia Chatarina
