BAUCAU, 23 jullu 2024 (TATOLI) – Autoridade Administrasaun Munisipál Baucau planeia sei muda negosiante sira nune’e hahú funsiona merkadu Tuanau iha tempu badak.
Prezidente Autoridade Munisípiu Baucau, Veneranda E. M. Lemos Martins, esplika, maske merkadu foun referida konstrusaun remata maibé sei presiza hadi’a tán fasilidade balun nune’e tempu besik realoka negosiante sira husi Vila Antiga no Vila Nova ba merkadu foun ne’e.
“Hau-nia hakarak ne’e muda iha inísiu fulan-agostu, maibé labele obriga, tanba haree hotu lai fasilidade sira hanesan estrada, bee-moos no ahi. Kuandu kompletu, sira bele muda ba ona,” Prezidente Autoridade Munisipál Baucau hateten iha Vila Nova, tersa ne’e.
Autoridade Baucau halo preparativu ne’ebé mak hanesan ateru rai-mutin ba estrada diresaun ba lokál merkadu, kanaliza bee-moos ba negosiante sira hanesan fa’an ikan, na’an no modo tahan inklui ba saneamentu.
Autoridade mós sei koordena ho parte Eletrisidade Timor-Leste, Empreza Publiku (EDTL.EP) atu instala eletrisidade iluminasaun iha área merkadu inklui instala postu seguransa hodi asegura situasaun ba komunidade.
“Provizoriamente bele halo baraka, planu ba oin ita sei halo merkadu ne’ebé adekuadu nune’e negosiante sira bele uza,” Veneranda Lemos akresenta.
Autoridade Munisipál liuhusi Diresaun Jestaun Merkadu rejista ona negosiante hamutuk 748 kompostu husi merkadu Vila Antiga no Vila Nova ne’ebé fahe ba tipu negósiu tolu hanesan negosiante dahuluk hamutuk 588, hanesan negosiante sembako 178, produtu lokál 52, ropa 235, materiál dapur 31 no modo 87.
Tipo negosiante daruak hamutuk 83, hanesan alfaiate 16, tesi fuuk tolu, ekipamentu uma 11, tais Timor neen, sapatu no brinkedus 44 no negosiante fa’an sanan-rai hamutuk tolu.
Enkuantu tipu negosiante datoluk hamutuk 77, hanesan fa’an na’an iha sia, ikan 22, bebidas 1, farmasia 5, dulas batar toou, elektróniku sia, hadi’a telefone no fa’an telefone 17 no mini restaurante 10.
Merkadu Tuanau ho totál medida hamutuk 22,489.60m², kompleta ona uma ba negosiante hamutuk haat, postu ba guarda seguransa merkadu ida, fatin sanitáriu ida, tanki rezervatóriu bee moos ida, fatin lixu nian no moru protesaun.
Jornalista : Natalino Belo
Editór : Evaristo Soares Martins
