OEKUSI, 12 Maiu 2025 (TATOLI) – Ministru Justisa (MJ), Sérgio de Jesus Fernandes da Costa Hornai, hamutuk ho Autoridade Rejiaun Administrativa Espesiál Oekusi Ambeno (RAEOA), sei tau atensaun ba problema emisaun dokumentu esensiál sira hanesan billete identidade no sertidaun RDTL iha Oekusi.
Ministru Justisa, informa, atu responde preokupasaun públiku kona-ba problema ne’ebé akontese iha Diresaun Rejistu Sivíl Notariadu Oekusi ba tratamentu dokumentu sira.
Notísia relevante:Notariadu Oé-Cusse fornese ona dokumentu ba vítima inséndiu Usitasa’e
“Ida-ne’e hotu, sai hanesan asuntu ida relasaun entre Governu Sentrál ho RAEOA, tanba diresaun rejistu notariadu iha Ministériu Justisa nia okos, maibé iha Autoridade RAEOA mós ejiste, entaun presiza ármonia no ajusta servisu sira, nune’e ita-nia servisu sira iha rejistu notariádu tenke kontinua no permanense atu labele iha interrupsaun,” dehan Ministru Justisa iha Oekusi, foin lalais ne’e.
Governante ne’e, informa, kona-ba preokupasaun sira durante ne’e la’os akontese de’it iha Oekusi, maibé iha mós munisipíu sira seluk, maibé kona-ba Oekusi nia sei ajusta iha Planu Asaun Anuál (PAA) 2026 hodi rezolve.
“Atu bele presta servisu sira iha ba ita-nia sidadun sira, entaun ita sei halo esforsu, ha’u ho Prezidente Autoridade RAEOA ko’alia bebeik atu bele iha intendimentu hanesan liuliu atu ajusta programa sira iha planu estratéjiku ba iha emisaun dokumentu esensiál sira ba sidadaun sira, nune’e sidadaun hotu bele hetan asesu ho di’ak,” nia promete.
Iha biban hanesan, Prezidente Autoridade RAEOA, Rogério Tiago Lobato, informa, problema kona-ba tratamentu dokumentu, durante akontese dala-barak ona iha Oekusi, nune’e presiza rezolve.
Notísia relevante:Rejistu Sívil Notariadu RAEOA kontribui reseita $9.350 ba kofre Estadu
“Iha ne’e (Oekuis), iha kazu balun ba nasionalidade ita-nia maluk balu ne’ebé mai husi Indonézia kaben iha ne’e no hela tinan barak ona, maibé susar atu hetan sertidaun RDTL no billete identidade, ne’e ha’u senti kazu konkretu, ne’ebé kooperasaun entre RAEOA ho Governu Sentrál liuhusi Ministériu Justisa ita-bele hadi’a, tanba ema hotu hakarak asesu hodi hetan dokumentu sira-ne’e,” nia afirma.
Entretantu, tuir dokumentu ne’ebé Ajénsia Tatoli,I.P, asesu iha livru Orsamentu Jerál Estadu (OJE) 2025 nian, katak alokasaun ho porsentagem ki’ikliu mak bens no servisu hamutuk $634,513 ka okupa 25.66% ho objetivu atu harii kuadru avisu ba fatin públiku ba área protezida iha teritóriu RAEOA, no mós fornesementu materiál eskritóriju, hola blanku Billete-Indentidade (BI), blanku casamentu no seluktan.
Notísia relevante:Rejistu Sivíl Notariadu Oé-Cusse hatama reseita rihun $39-resin ba kofre Estadu
Jornalista: Abílio Elo Nini
Editór: Florencio Miranda Ximenes
