DILI, (TATOLI) – Prezidente Repúblika, Francisco Guterres Lú Olo, simu karta kredensiál hosi Embaixadór Estraordináriu no Plenipotnesiáriu hosi nasaun-11 iha 28 Fevereiru to’o 1 marsu 2019 iha Palásiu Prezidensiál Nicolau Lobato, Bairru Pité.
Embaixadór Estraordináriu no Plenipoténsiáriu ne’ebé entrega sira nia karta kredensiál ba Prezidente Repúblika maka Haji Adnan Bin Haji Mhod Jaafar hosi Brunei Darrusalam, Stéphane de Loecker hosi Béljika, MH. Pham Vinh Quang hosi Vietname, Akua Senkyiwa Ahenkora hosi Ghana.
Anne Namakau Mutelo hosi Namíbia, Patrick Bourne hosi Irlanda, Kurt Kunz hosi Suiça, Roland Ng San Tiong hosi Singapura, Peter Schoof hosi Alemaña, Hilton Fisher hosi Áfrika do Súl, Abdul Salik Kham hosi Paquistão.
Xefe Estadu simu karta kredensiál hirak ne’e bazea ba Konstituisaun RDTL artigu númeru 87 relasiona ho kompeténsia domíniu kona-ba relasaun internasionál.
Ministra Negósiu Estranjeiru no Kooperasaun Interina, Dulce de Jesus Soares, ne’ebé akompaña prosesu entrega karta kredensiál refere hateten entre embaixadór hirak ne’e úniku Embaixadór Brunei Darrusalam maka rezidente iha Timor no sira seluk ne’e rezidente iha Jakarta, Malázia no Singapura.
“Iha area kooperasaun lubun ida maka Timor-Leste haree hela no tenkiser serbisu maka’as liu atu haree, tanba ezemplu iha nasaun balun maka sira mai hanesan kompromisu polítika ida simbólika ida halo relasaun diplomátika ho Timor-Leste maibé iha nasaun balun maka halo ona kooperasaun ho sira”, Dulce esplika.
Nia haktuir nasaun Vietname, Timor-Leste iha kooperasaun balun ne’ebé maka tenkiser kontinua halo implementasaun iha área agrikultura, edukasaun no defeza.
“Maior parte hosi nasaun sira ne’e hotu ita iha istória ne’ebé maka sira fó apoiu ba ita durante luta ba libertasaun nasionál no kontinua amigu to’o ohin loron. Tanba ne’e, Ministériu Negósiu Estranjeiru no Kooperasaun sei identifika área ne’ebé maka poténsia ba Timor-Leste atu halo kooperasaun no Timor-Leste hanesan nasaun benefisiáriu apresia tebes sira nia prezensa”, tenik.
Dulce katak Timor-Leste kuaze halo kooperasaun ho nasaun sira ne’e hotu iha área edukasaun, ezemplu iha Vietname iha estudante bolseiru hosi Timor-Leste nomós iha Brunei Darussalam no sira seluk tan.
Jornalista: Xisto Freitas
Editora: Rita Almeida
