DILI,04 outubru 2022 (TATOLI)— Diretór Hospitál IHeal Medical Centre, Malázia, David Khoo, hateten ekipa tékniku hosi Ospitál IHeal prontu fó asisténsia tékniku ba Ministériu Saúde (MS) hodi harii sentru kardiolojia iha Timor-Leste.
Diretór Hospitál Iheal Centre hato’o kompromisu ne’e bainhira halo sorumutu ho Ministru Asuntu Kombatente Libertasaun Nasionál (MACLN), Júlio Sarmento da Costa “Meta-Malik” iha Caicoli, tersa ne’e.
“Ami hosi Malázia, mai iha ne’e hakarak apoia Ministériu Saúde atu harii sentru kardiolojia iha Dili, no espera liuhosi fasilidade ne’ebé iha ema Timoroan la presiza ba rai li’ur, hodi halo tratamentu saúde ba moras kadiovasular, maibé bele halo tratamentu operasaun iha Dili,” katak Diretór Ospitál IHeal Medical Centre ne’e.
Nia espera sentru kardiolojia ne’e bele hahú harii iha janeiru 2023, tanba ekipa tékniku husi Malázia komesa deskuti ona ho MS no MACLN.
Alende, Ospitál IHeal Malázia fó asisténsia tékniku ba estabelese sentru kardiolojia, sei fó mós kapasitasaun iha rekursu umanu hodi bele fó atedimentu ba pasiente sira ne’ebé moras kadiovaskular.
Iha biban hanesan, Ministru Asuntu Kombatente Libertasaun Nasionál (MACLN), Julio Sarmento da Costa “Meta-Malik”, hateten durante tinan 10 ona veteranu barak mak bá halo tratamentu saúde iha Malázia tanba sofre koardiovaskular.
“Durante ne’e, gasta osan barak ba halo tratamentu saúde iha rai li’ur, tanba ne’e ekipa tékniku sira to’o ona iha ne’e konkorda hamutuk atu apoiu Timor Leste hodi kria rasik fatin kardiolojia hodi halo tratamentu iha rai-laran,” nia afirma.
Tuir dadus hahú hosi janeiru to’o jullu 2022, MACLN gastu miliaun $1-resin hodi halo transfere vetaranu ba Malázia hodi halo tratamentu saúde tanba sofre kardiovaskular.
Notísia relevante: MS planu sosa ekipamentu kardiolojia hodi redús transfere pasiente bá diaspora
Jornalista : Felicidade Ximenes
Editór : Florencio Miranda Ximenes
