DÍLI, 04 Juñu 2026 (TATOLI) – Pároku Parókia São José Ai-Mutin, Amu Benediktus Nuwa, CMF, hateten katak Loron Corpu de Deus tenke selebra ho laran kontente tanba loron ne’e sai momentu importante ida ba ema sarani sira atu hanoin-hikas, agradese no hametin sira-nia fiar ba Jesus Kristu nia prezensa real iha Sakramentu Eukaristia.
Ba TATOLI iha Parókia São José Ai-Mutin, Dili, Amu Benediktus esplika katak objetivu prinsipál husi selebrasaun Corpu de Deus mak atu ajuda sarani sira hatene lolos katak iha ostia no tua ne’ebé konsagra iha Misa Santu mak Nai Jesus Kristu nia Isin no Raan duni, la’ós de’it hanesan símbolu relijiozu ida.
“Selebrasaun ne’e ajuda ema sarani sira atu hatene no fiar katak iha ostia no tua ne’ebé simu iha Misa Santu, iha Jezús Kristu nia Isin no Raan rasik. Nune’e, Corpu de Deus la’ós de’it selebrasaun ida iha igreja laran, maibé mós oportunidade atu ema sarani sira hamriik hamutuk no fó sasin ba mundu kona-ba Maromak nia domin ne’ebé hela hamutuk ho ema,” dehan Amu Benediktus.
Nia mos enfatiza katak Loron Corpu de Deus sai tempu apropriadu ida atu agradese ba sakrifísiu Jesus Kristu nian no ba grasa moris ne’ebé Nia fó ba ema liuhosi Nia Isin no Raan iha Eukaristia.
Nia hateten, Sakramentu Eukaristia hanorin ema sarani sira atu hadomi no hakbesik-an ba Kristu tanba sakramentu ne’e hatudu Jesus nia domin ne’ebé kle’an no boot liu ba ema hotu.
“Liuhosi Eukaristia, Jesus Kristu entrega Nia an tomak ba ita nu’udar ai-han espirituál no bolu ita atu hadomi malu no hadomi Nia ho laran tomak,” nia dehan.
Iha doutrina Igreja Katólika nian, Eukaristia konsidera hanesan Sakramentu Domin nian. Eukaristia la’ós de’it sinál ka símbolu, maibé sakrifísiu no prezensa real Jesus Kristu nian iha Ostia Santu no Tua Sagradu. Sakramentu ne’e mós fó kbiit no moris espirituál ba sarani sira.
Amu Benediktus hatutan katak bainhira ema sarani simu Komuñaun Santu, sira simu konvite atu moris tuir Jesus nia mandamentu atu hadomi malu hanesan Nia rasik hadomi ema hotu.
“Bainhira simu Komuñaun Santu, ita simu mos responsabilidade atu pratika domin iha moris loroloron, tuir ezemplu ne’ebé Jesus Kristu husik hela ba ita,” nia konklui.
Jornalista: Camilio de Sousa
Editór: Filomeno Martins
