KOVALIMA,14 Jullu 2025 (TATOLI)- Komandu Polísia Nasionál Timor-Leste (PNTL), Munisípiu Kovalima, liuhusi Sesaun Tránzitu, durante fulan-neen, arrekada reseita $16,463.00 ba kofre Estadu.
“Ita konsege rekolla ona reseita $16,463.00 ba kofre Estadu durante fulan-neen la inklui fulan Jullu ni’an. Reseita hirak ne’e PNTL Kovalima rekolla husi atividade pasa revista ba transporte públiku hanesan motorizada no karreta inklui kareta Estadu no Governu”, Komandante PNTL Kovalima, Asistente Superintendente Polísia Inacio Amaral, informa ba Jornalista sira, iha edifísiu PNTL Santa-Rosa, ohin.
Notisia relevante:PNTL Kovalima estabelese estrutura KPK iha suku rua
Liuhusi pasa revista mak deteta infratór sira kontra kódigu estrada hanesan viola sinál tránzitu, la lori dokumentu,la renova dokumentu,la uza kapasete no kontra ordém seguransa mak ekipa halo apreensaun no aplika sansaun hodi selu multa.
Servisu tránzitu la’ós kontrola de’it ba transporte privadu, maibé kontrola mós karreta no motorizada privadu ne’ebé halo movimentu iha loron nasionál no mós iha fim de semana hanesan loron sábadu no Domingu.
“ Ita nia objetivu kontrola karreta ho motorizada Estadu ne’e liuhusi orientasaun husi Komandu Jerál. Ita halo operasaun auto stop iha loron sábadu no Domingu atu kontrola movimentu funsionáriu públiku sira uza transporte Estadu hanesan, karreta Governu no motorizada”, nia afirma.
Notisia relevante:PNTL detein ona suspeitu ba Peregrina da Conceição nia mate
Jornalista:Celestina Teles
Editór: Florencio Miranda Ximenes
