BOBONARU, 09 Fevereiru 2026 (TATOLI) – Movimentu Karreta no motorizada husi diresaun postu administrativu Maliana bá Bobonaru no Lolotoe daudaun hasoru difikuldade, tanba ponte tuan iha área Gasulapu, suku Lahomea, no ponte ida besik minimerkadu Ili-bole hetan danus.
Motorista kamioneta, José de Jesus Lopes, preokupa tanba tempu udan fatin rua ne’e sempre hamosu engarrafamentu.
“Iha oituan ne’e ho sa’e bá Ili-bole nia ne’e udan hanesan ne’e karreta ho motór butuk malu. Tanba bee boot, ita liu la di’ak. Ponte ida uluk iha ne’e aat tiha. La hatene, eksavadór ida uluk mai sobu sai tiha ponte la monta fali. Ne’e mak agora udan ne’e susar. Ami liu iha mota-laran de’it, bee boot ami sei para, hein to’o maran mak foin bele liu. Se udan boot, entaun ami hein to’o hamlaha”, nia hato’o ba Tatoli, ohin.
Notísia relevante: Estrada ligasaun Bobonaru-Zumalai no Atsabe ameasada kotu
Tanba ne’e, nia rekomenda ba Governu atu buka meiu hodi halo intervensaun imediata. “Tau netik ponte sementara para udan ami bele liu bá-mai. Se la’e, udan ona karreta no motór metin hotu iha ne’e, tanba bee maka’as, atu liu mós la di’ak”, nia fó hanoin.
Aleinde ne’e abitante Vitorino de Oliveira reforsa katak problema ne’e afeta tebes ba atividade ekonómika, saúde no seluk tan. “Udan mai angguna sira para hotu. Penumpang sira sa’e ne’e atu lori produtu bá fa’an iha merkadu mós la di’ak, tanba estrada la di’ak ho tan ponte. Foin lalais ne’e ambulánsia lori ema moras mai, tanba urjente, bee boot mós obriga liu, komunidade sira ajuda dada. Ida-ne’e risku tebes”, nia dehan.
Vitorino mós husu ba Governu atu aselera prosesu reabilitasaun estrada Maliana Vila bá Bobonaru no Lolotoe, tanba tinan barak ona povu halerik tebes ba estrada. “Tinan uluk sira mai sukat tiha, más la hatene agora nia prosesu to’o ona iha ne’ebé? Ami povu la hatene, iha munisípiu seluk foin lalais halo lansamentu estrada, ami-nia mai Bobonaru ne’e bainhira karik”, nia kestiona.
Lembra katak estrada ne’e iha tinan 2017 Ministériu Obra Públika kontrata empreza lokál Vieramor Unipessoal Lda., hodi halo manutensaun no ponte ho kustu $2.060.737,42, maibé projetu ho karáter emerjénsia ne’e to’o agora seidauk finaliza no paradu hela.
Notísia relevante: Distánsia no estrada aat kauza bebé lakon vida
Jornalista: Sergio da Cruz
Editora: Maria Auxiliadora
