BOBONARO, 12 agostu 2021 (TATOLI)—Populasaun hamutuk 1.547 hosi suku Ritabou, postu administrativu Maliana, munisípiu Bobonaro, simu ona vasina AstraZeneca.
“Durante implementasaun, komunidade barak mak mai rasik atu simu vasina iha postu vasinasaun-sira, balun simu kompletu ona no balun mak seidauk kompletu,” Xefe Suku Ritabou, Maximiano dos Santos Araújo, hateten ba jornalista Agência Tatoli, iha sede suku Ritabou, kinta ne’e.
Notísia relevante:Vasina iha Bobonaro remata ho pesoál liña frente 1.292
Autoridade lokál kontinua orienta xefe aldeia-sira atu fahe imformasaun ba populasaun, nune’e bele hakbesik ba sentru vasinasaun, atu aumenta imunidade kontra COVID-19.
Tuir dadus ne’ebé serbisu saúde munisípiu Bobonaro enumera, polulasaun tarjetu iha suku Ritabou hamutuk 2.364 mak sei simu vasina doze dahuluk hahú hosi 13 to’o 17 agostu iha sentru vasinasaun 12 ne’ebé estabelesidu iha kada aldeia.
Iha fatin hanesan abitante Rosina Gonçalves, rekoñese katak durante ne’e la hetan informasaun klara kona-bá efeitu hosi vasina ne’e, maibé ho prezensa na’i ulun-sira, iha kampaña vasinasaun motiva tebes atu haka tba simu vasina.
Ritabou iha aldeia sanulu 12 kompostu aldeia, U’at, Maganutu, Daitete, Ritiudu, Ma’ahui, Ritabou, Tilnatan, Samutaben, Diruaben, Moleana, Korluli no Halekou ho populasaun alvu atu vasina hamutuk 3.913.
Metade populasaun iha Lour simu ona AstraZeneca
Nune’e mós Xefe suku Lour, Miguel Lopes Gomes, informa populasaun suku Lour, postu administrativu Bobonaro, munisipiu Bobonaro idade 18 ba leten hamutuk 205 mak simu ona AstraZeneca doze dahuluk falta na’in 213.
“Desde suspensaun vasina, komunidade na’in 102 iha suku ne’e mak simu ona, no iha 05 to’o 06 agostu, hafoin Ministra Saúde halo lansamentu, iha na’in 103 mak simu tán doze dahuluk,” Miguel Lopes Gomes, hateten.
Tuir observasuan autoridade lokál katak, bainhira Ministra Saúde halo tiha diálogu ho komunidade, hodi esplika detallu kona-bá importánsia hosi vasina, iha loron ne’e kedan komunidade ho voluntariamente hakarak simu vasina.
Autoridade lokál ne’e hameno hela ba médiu-sira atu kontinua implementa vasina iha suku Lour, hodi kompleta enumerasaun populasaun tarjetu hamutuk 418.
Jornalista: Sérgio da Cruz
Editór: Cipriano Colo
