BAUCAU, 20 juñu 2023 (TATOLI) – Postu administrativu Laga sei hein transferénsia orsamentu atu implementa Programa Mão de Obra Postu Administrativu (PMOPA) tinan-2023.
Administradór postu administrativu Laga, Domingos Loiola, esplika, autoridade suku Ualu hamutuk postu halao ona reuniaun konsellu postu deside ona PMOPA tinan-ne’e sei realiza ho atividade hanesan reparasaun estrada eskala kiik, limpeza jerál inklui kuda ai-oan.
“Ami seidauk implementa mesmu pedidu hato’o ona maibé sei hein orsamentu bainhira transferénsia ami sei implementa,” Administradór postu administrativu Laga hateten iha Vila Antiga, tersa ne’e.
Atividade refere tuir planu sei envolve traballadór informál hosi suku ualu ne’ebé kada grupu hamutuk 20 ho durasaun serbisu loron-20 iha faze dahuluk.
Totál orsamentu ne’ebé aloka ba postu Laga hamutuk rihun $100 fahé pursentu 50 hodi implementa iha faze dahuluk ho pursentu 95 kustu operasionál innklui pursentu 5 aloka ba administrasaun.
“Komunidade sente programa ne’e benefísiu direita tanba ne’e governasaun foun mai husu atu kontinua,” Domingos Loiola akresenta.
Totál orsamentu PMOPA ne’ebé aloka ba munisípiu Baucau tinan-2023 hamutuk rihun $600, kada postu administrativu hetan rihun $100, komposta hosi kustu operasionál pursentu 5 no kustu atividade pursentu 95 no sei envolve traballadór informál hamutuk 5.588.
Postu Laga hamutuk suku ualu komposta hosi Atelari, Libagua, Nunira, Saelari, Sagadate, Samalari, Soba no Tekinomata ho totál populasaun hamutuk 14.432.
Jornalista : Natalino Belo
Editór : Evaristo Soares Martins
