DILI, 02 fevereiru 2023 (TATOLI) – Prezidente Repúblika (PR), José Ramos Horta, prefere kualidade duké kuantidade iha FALINTIL-Forsa defeza Timor-Leste (F-FDTL).
“Lalika buka ema barak demais iha forsa tantu iha militár ou polísia. Ha’u prefere iha de’it ema lubun-ida mane no feto, iha motivasaun aas, ne’ebé hetan prémiu di’ak, remunerasaun di’ak no ekipamentu di’ak. Fó mobilidade di’ak ba sira, fleksibilidade operasionál, insentivu duké rihun lima ka rihun sanulu, maibé vensimentu ladi’ak, treinamentu lasufisiente, ekipamentu ladi’ak, no laiha motivasaun”, Horta hatete iha ámbitu aniversáriu Transformasaun FALINTIL ba FDTL ba dala-22, iha Kuartel Jenerál Fatuhada, kinta ne’e.
Xefe Estadu konvida hothotu hodi haree iha rai barbarak iha mundu, tanba nia rasik haree ho matan katak rai ne’ebé sei ki’ak, balun ladún ki’ak hanesan Timor-Leste, maibé sira iha nivel iha sub-dezenvolvimentu.
“Prefere efetivu menus, maibé kualidade aas liu, fó formasaun ho kualidade operasionál ba nia, no ekipamentu nune’e nia bele halo serbisu ema rihun 10 nian”, nia tenik.
Horta hatutan iha rai sira iha mundu forsa barak demais, maibé ekonomia nasaun nian lasufisiente para tane forsa-armada.
Nia husu ba forsa sira atu disiplina, tanba buat ne’ebé Estadu entrega ba sira, hanesan forsa-armada ka polísia no instituisaun sira seluk ne’e tenke tau-matan didi’ak, halo manutensaun, nune’e labele gasta arbiru konfiansa povu nian.
Komandante Supremu ne’e enkoraza Komandu F-FDTL atu hametin liután kooperasaun iha dezenvolvimentu programa tékniku militár ho rai sira ne’ebé hakbesik ba Timor-Leste, hanesan Austrália, Nova Zelándia, Indonézia, Malázia, Singapura, Koreia Súl, Japaun, Portugál no Estadu Unidu Amérika.
“Povu fó fiar nafatin forsa armada, tanba tane destinu nasaun dezde uluk. Nune’e, husu nafatin respeita no labele hakribit esperansa povu nian ne’ebé fó ba forsa armada no Estadu. Ita mesak fó dignidade ba misaun konstitusionál ida ne’e, katak defensór suberania independénsia nasionál, garante orden demokrátika”, nia afirma.
Ba Xefe Estadu, importante liu ida-idak iha F-FDTL iha nia kakutak, neon no matenek atu serbí dame, demokrasia no Estadu direitu. Nia ejize líder militár sira kahe iha sira-nia kabás instituisaun militár bainhira tau-matan ba pozisaun aas sira ne’ebé nasaun fó. Ezerse sira-nian autoridade ho liman toos, inspira membru forsa armada hothotu, no iha profisionalizmu no disiplina maka’as.
Tinan 2023 F-FDTL iha orsamentu millaun $33,22. “Atu ezekuta orsamentu ida ne’e, tuir programa. Espera katak kontinua investe iha reorganizasaun, profisionalizasaun F-FDTL no buka kualidade di’ak liután”, konklui.
Tuir dadus iha tinan kotuk, F-FDTL iha membru efetivu hamutuk 2.746, husi númeru ne’e 282 mak feto.
Jornalista: Antónia Gusmão
Editora: Maria Auxiliadora
