DILI, 02 Jullu 2026 (TATOLI)—Primeiru-Ministru no Ministru Finansa Repúblika Singapura, Lawrence Wong, akompañadu husi ninia espoza, Loos Tze Lui, no delegasaun to’o ona iha Aeroportu Internasionál Nicolau Lobato (AINLP) maizumenus iha tuku 15h49 lorokraik.
Notísia Relevante: Vizita PM Lawrence Wong hametin kooperasaun estratéjika Timor-Leste–Singapura
Hafoin to’o iha aeroportu simu ofisialmente husi Prezidente Repúblika, José Ramos-Horta, Primeiru-Ministru, Kay Rala Xanana Gusmão, membru governante sira, akompaña husi parada militár, dansa kultura (likurai) ho tara tais.
Objetivu husi prezensa Xefe Governu Singapura iha Timor-Leste hodi reforsa tan kooperasaun bilaterál liuliu kona-ba dezenvolvimentu polítika no diplomátiku, entre nasaun rua ne’e.
Anets ne’e, Ministru Negósiu Estranjeiru no Kooperasaun, Bendito dos Santos Freitas, na jornalista iha kuarta ne’e, hateten katak vizita ne’e hanesan kontinuasaun esforsu rai-rua nian atu haburas relasaun polítika, diplomátika no kooperasaun ba dezenvolvimentu.
“Nia vizita importante tebes atu hametin no reforsa tan relasaun bilaterál entre Timor- Leste no Singapura. Hanesan ita hotu hatene, iha tinan 2025, Primeiru Ministru Kay Rala Xanana Gusmão hala’o vizita ofisiál ba Singapura no entrega karta konvite ofisiál ba Primeiru Ministru Lawrence Wong atu halo vizita mai Timor-Leste,” Bendito hateten.
“Ita fiar katak vizita ne’e bele iha solusaun barak liu tan ba ita-nia kooperasaun bilaterál entre nasaun rua ne’e”, tenik nia.
Iha prosesu dezlokasaun movimentu ho Prezidente Repúblika nia kareta klasíku modelu mini moke azúl nian ba fatin deskansa, akompañia husi protokolu no parte seguransa nian, aleinde ne’e labarik estudante wa’in na wa’in mak hamri’ik iha estrada ninin kaer ho bandeira Timor-Leste, Singapura no ASEAN nian hodi hakilar no antisiazmu simu beinvindu prezensa Primeiru-Ministru Singapura.
Tuir programa ne’ebé Governu aprova, durante vizita ofisiál ne’e, Primeiru Ministru Lawrence Wong sei hasoru malu ho Prezidente Repúblika, José Ramos-Horta hodi simu kondekorasaun orden kolár Timor-Leste no mós enkontru bilaterál ho Primeiru-Ministru Kay Rala Xanana Gusmão. Hafoin ramata enkontru nia sei fila hikas ba nasaun orijen Singapura iha oras lorokraik.
Jornalista : Alexandra da Costa
Editór : Cancio Ximenes
