BOBONARO, 07 juñu 2024 (TATOLI)-Estadu Unidu Amérika liuhusi Ajénsia Dezenvolvimentu Internasionál (USAID, sigla ingles), hamutuk Ministériu Agrikultura, Pekuária, Peska no Floresta, sesta ne’e lansa projetu Redusaun Risku Klimátika iha Timor-Leste no Indonézia (CRITICAL) ne’ebe sei implementa husi Word Neighbors ho tarjetu ba ema na’in rihun 24 iha Rejiaun Espesiál Oe-Cuse Ambeno (RAEOA) no munisípiu Bobonaro.
Prezidente CEO Word Neighbors, Edd Wright, asina nota entendimentu ho Prezidente Autoridade Munísipiu Bobonaro, Alexandre Pires, hodi ofisializa estabelesimentu baze projetu CRITICAL iha munisípiu Bobonaro.
Enkuantu iha tersa liubá halo ona lansamentu iha (RAEOA).
Enkuantu projetu ne’e implementa kolabora hamutuk ho Ministériu Agrikultura, Pekuária, Peska no Floresta ho durasaun tinan haat.
Prezidente CEO Word Neighbors, Edd Wright, esplika, projetu ne’e implementa ho objetivu atu hametin reziliénsia komunidade kontra mudansa klimátika no impaktu sira relasiona ho dezastre naturál.
Notísia relevante: EUA-TL lansa projetu CRITICAL atu hasa’e reziliénsia komunidade ba mudansa klimátika
“Projetu ne’e tarjetu ba ema hamutuk na’in 24,000 iha munisípiu Bobonaro no RAEOA, intervensaun projetu nia sei foka liu ba hadi’a produsaun agríkola liuhusi aproximasaun agríkola,
klimatikamente intelijente, protesaun no konservasaun ba bee-matan komunitária sira liuhusi hadi’a planeamentu rekursu bee,” nia hateten.
Nune’e mós konservasaun rai no jestaun rekursu naturál sira no haforsa ekonómiku liuhusi hasa’e asesu ba servisu mikrofinánsia bazeia ba komunidade no habelar opsaun sira buka moris ka vida moris rurál nian.
Prezidente Autoridade Munísipiu Bobonaro, Alexandrino Pires, orgullu no konsidera implementasaun projetu ne’e bele tulun rezolve komunidade sira-nia preokupasaun no dezenvolve setór agrikultura iha munisípiu Bobonaro inklui redús dezastre naturál.
“Ita haree katak iha dezastre naturál kuaze tinan ida-ne’e susar tebes, prezudika movimentu povu ninian, tanba sira lori osan mai atu tulun inan-aman sira oinsá atu kumpriende no jere osan. Ida-ne’e mak importante ba ita no atu redús risku sira,” nia hateten.
Prezidente Autoridade Munísipiu Bobonaro ne’e orienta ba administradór postu no líder suku 50, atu fó apoia no kolabora ho parseiru hodi fo susesu ba implementasaun projetu ne’e.
Programa CRITICAL ho fundu millaun $6,6 husi USAID ne’e sei kobre Timor-Leste no Indonézia husi 2024 to’o 2028 oinsá atu hadi’ak estrativa efetivu ba redusaun risku klimátika atu aumenta produtividade agríkola, protesaun kontra peste no moras no reziliénsia peska lokál.
Redusaun Risku Klimátika iha Timor-Leste no Indonézia (CRITICAL) nu’udar projetu ida ne’ebé finansia husi USAID/BHA durante tinan haat ho objetivu atu halo komunidade sira ne’ebé vulnerável iha área foho no tasi-ibun enfrenta krize klimátika nia sai reziliente liu.
Programa CRITICAL inklui intervensaun abrajente ida ba kapasitasaun mak hanesan formasaun kona-ba jestaun be’e ba halo to’os, konservasaun agrikultura, agrofloresta no promove aihoris ne’ebé reziliénte kontra bailoron naruk, liu-liu sorghum.
Intervensaun seluk inklui jestaun integradu kontra pesti ne’ebé lidera husi to’os na’in sira no teknolojia dijitál klimátika no preparasaun ba dezastre ba to’os na’in no peskadór sira.
Projetu ida-ne’e ninia objetivu atu benefísia diretamente komunidade vulnerável sira iha área alvi iha Timor-Leste no Indonézia ho aumenta produsaun agrikola ba ema 69,200, fornesimentu be’e, saneamentu, no ijiene ba ema 19,200, apoia rekuperasaun ekonómika no sistema merkadu ba ema 4,485.
Fundu ba CRITICAL ne’e fornese husi USAID liuhosi Eskritóriu Apoiu Umanitáriu (sigla ingles, BHA), ne’ebé reflete kompromisu governu EUA nian atu investe iha dezenvolvimentu ekonómiku sustentável no seguransa ai-han Timor-Leste nian.
Notísia relevante: EUA no Timor-Leste kontinua implementa Programa F2F hodi promove agronegósiu no nutrisaun
Jornalista: Sérgio da Cruz
Editór: Evaristo Soares Martins
