DILI, 14 Novembru 2025 (TATOLI)—Diretór Nasionál Infraestutura Edukativa Ministériu Edukasaun (ME), Hélio Lopes informa projetu foun ba konstrusaun eskola iha tinan ne’e seidauk bele konkluidu tanba kondisaun estrada ladi’ak.
“Ita-nia projetu ba tinan ida-ne’e, ita iha projetu foun 14 ne’ebé nia andamentu to’o agora 30%-40%. Projetu ne’e sei la konklui iha tinan ida-ne’e tanba kondisaun balun ne’ebé la permite atu konklui. Hanesan iha fatin balun ne’ebé difísil tebes-tebes atu asesu ba estrada no kondisaun estrada ne’e rasik difikulta movimentasaun materiál, entaun ida-ne’e sai kauza ba projetu referidu,” nia dehan ba jornalista sira iha knaar fatin, Vila Verde, Dili, Sesta ne’e.
Maibé, tuir nia, projetu Eskola Bázika Filiál (EBF) Loré iha Munisípiu Lautein tama ona ba faze finishing, nune’e espera iha fulan-Dezembru tinan ne’e bele entrega ba Governu no bele utiliza ba prosesu aprendizajen.
Projetu 14 ne’e kompostu husi Munisípiu Aileu mak Ensinu Báziku Filiál iha ida, Ainaru ida, Baukau iha EBF ida iha Osoluga, Bobonaru rua mak Ensinu Báziku Filiál no Ensinu Báziku Sentrál, iha Kovalima iha rua, Ermera iha EBF rua 2, Likisá EBF ida, Lautein EBF ida, Manatutu EBF rua no Manufahi iha EBF ida.
“Ba projetu 14 ne’e ita (Ministériu Edukasaun) aloka millaun $1.2,” Lopes esplika.
Aleinde ne’e, Ministériu Edukasaun iha planu atu konstrui tan eskola foun hamutuk 69 iha tinan 2026, maibé nia orsamentu sei debate iha Parlamentu Nasionál. Kuandu aprova ona mak hahú halo implementasaun fízika.
“Projetu ida-ne’e ba nivel eskolaridade iha territóriu,” Helio subliña.
Jornalista: Osória Marques
Editór: Xisto Freitas da Piedade
