MANATUTO, 25 abríl 2023 (TATOLI)—Prezidente Partidu Unidade Dezenvolvimentu Demokrátiku (PUDD), Silvestre Sufa, hateten iha eleisaun lejizlativa 21 maiu 2023 bainhira povu Manatuto fó fiar atu kaer ukun, mak PUDD nia programa prioridade dahuluk mak hadi’a irrigasaun iha Manatuto.
Notísia Relevante: PUDD kompromete tau prioridade ba área peska
“Ba Manatuto PUDD prontu hadi’a irrigasaun no ativa irrigasaun ne’ebé pasadu nian hanesan irrigasaun tempu Indonézia nian agrikultór sira uza no ukun-aan tiha ema la uza ona. Ida-ne’e mak ba ami-nia programa prioridade PUDD nian ba komunidade Manatuto,” nia hateten ba jornalista sira, hafoin hala’o kamapaña ho tipu diálogu nian iha Manatuto, tersa ne’e.
Tanba, tuir nia, irrigasaun ne’e tempu Indonézia komunidade uza maibé Timor-Leste ukun-aan tiha natar la ativa ona, nune’e bainhira PUDD manán sei hadi’a no ativa hikas irrigasaun, nune’e povu bele asesu hodi halai natar.
“Aleinde ne’e, PUDD sei hadi’a barajen tanba ita hatene katak agrikultura Manatuto mós barak no presiza duni halo barajen,” nia hateten.
Programa seluk, nia dehan, PUDD sei tau prioridade ba peska bainhira povu Manatuto fó fiar ba PUDD atu kaer ukun.
“Ita tenke fasilita ita-nia peskadór sira, hodi nune’e halo produsaun ba ikan. Nune’e labele loke dalan ba ema estranjeiru sira hodi importa sasán mai Timor-Leste. Ida-ne’e fó desvantanjen ba peskadór timoroan sira iha Timor-Leste,” nia dehan.
Koordenadór Manatuto, Manuel Soares, hateten nia parte sei esforsu hodi PUDD hetan vitória iha munisípiu Manatuto hodi realiza programa PUDD nian.
“Ho programa prioridade ne’ebé iha hodi halo dezenvolvimentu ba rai ida-ne’e, ha’u esforsu nune’e bele manán iha Manatuto ne’e,” nia hateten.
Jornalista : Osória Marques
Editór : Cancio Ximenes
