BOBONARO, 06 jullu 2022 (TATOLI) – Udan-boot ne’ebé akontese iha loron-segunda, 04 jullu rezulta rai halai no sobu estraga uma-lisan rua iha aldeia Molop-Taz, suku Molop, postu administrativu Bobonaro, munisípiu Bobonaro.
“Udan-boot iha loron rua nia laran halo rai halai lori uma rua tipu permanente nakfera hotu kedas, ne’e uma-lisan hotu ida hosi lisan Dala-Bul no Uma-Lisan Deu-datho,” Xefe suku Molop, Manuel Moniz de Jesus, informa ba Agência Tatoli, liuhosi telefónika, kuarta ne’e.
Nia esklarese, durante ne’e akontesimentu dezastre naturál ne’e la rezulta ema ruma kanek inklui sasan-lulik balun ne’ebé tau iha laran, maibé aliserse uma rua ne’e nakfera hotu tanba uma ne’e konstrui iha fatuk no foho lolon.
“Sasán sira la hetan estragu tanba família no komunidade sira ajuda malu evakua kedas ba fatin seguru, ne’ebé agora vítima sira hela iha uma-lisan rua ne’e provizóriu hela iha família nia uma ne’ebé besik,” nia hatutan.
Nia reforsa, hafoin akontese uma rua ne’e hetan estragu informa kedas ba parte Servisu Solidariedade Sosiál no Inkluzaun no Diresaun Servisu Protesaun Sívil Risku Deazstre Munisípiu Bobonaro atu halo atendimentu emerjénsia ruma.
“Maske uma-lisan rua ne’e ema barak nian, sé bele ajuda umanitária no emerjénsia sira-ne’e bele dezloka daudaun ona, tanba ema-ne’ebé hela iha laran ne’e mak vítima, sira hosi protesaun sívil, ha’u informa ona konforme sira-nia tempu atu halo verifikasaun no halo levantamentu dadus,” nia hateten.
Diretór Servisu Protesaun Sívil Risku Dezastre Munisípiu Bobonaro, António Soares, simu ona informasaun hosi lideransa komunitária tanba ne’e tempu badak sei apoia emerjénsia ba vítima afetadu uma lisan rua ne’e.
“Ami sei fó apoia umanitária sira hanesan food item, foos, mina, ikan-lata, masin no seluk tán. Non food item nian mak lona, bikan, taxu, kanuru, ropa no seluk tán, maibé agora ita atu tula tanba rai sei udan hela,” nia hateten.
Kona-ba apoia rekuperasaun ba uma-lisa rua ne’e, António sei relata ba Sekretariu Estadu Arte no Kultura (SEAK).
Nia apela ba komunidade iha suku Molop no iha munisípiu Bobonaro laran tomak, bainhira akontese udan-boot tenke hadook-aan.
“Importante liu mak asegura uluk ita-nia aan no labarik kiik sira, depois mak riku-soin sira hanesan, diploma eskola, osan no osan mean lulik sira-ne’e tau kedas iha pasta,” nia fó hanoin.
Jornalista : Sérgio da Cruz
Editór : Evaristo Soares Martins
