DILI, 05 marsu 2024 (TATOLI)-Deputadu KHUNTO, António Verdiál de Sousa, husu ezekutivu atu investe ekipamentu laboratóriu hodi harii laboratóriu nasionál ida hodi bele halo teste ba produtu importasaun.
“Husu harii laboratóriu nasionál hodi teste ba produtu importasaun ne’ebé tama hosi rai-li’ur,” Deputadu KHUNTO ne’e hato’o liuhosi intevensaun polítika iha reuniaun plenária PN, tersa ne’e.
Nia dehan, iha Timor-Leste seidauk iha laboratóriu hodi teste ai-han ne’ebé ita importa hosi rai-li’ur, tanba nakait ho saúde populasaun nian nune’e presiza teste ai-han importasaun ho kontaminasaun kímiku no konserva iha jeleira.
Tuir nia, realidade ne’ebé hatudu katak durante ne’e iha Timor-Leste ne’e, timoroan barak mak mate derrepente ho tinan ne’ebé sei produtivu hela.
“Parte relevante presiza halo estudu karik ema mate no ai-han kímiku, entaun Governu kria polítiku harii laboratóriu nasionál,” nia hateten.
Deputada CNRT, Aliança da Conceição, preokupa ho informasaun ne’ebé iha katak loza balun faan manu-tolun plástiku ka manu-tolun imitasaun, nune’e husu parte kompetente atu halo inspesaun hodi haree.
Deputadu FRETILIN, Antoninho Doutel Sarmento no Deputada PLP, Maria Angelina Sarmento, mós husu ezekutivu presiza investe fasilidade laboratóriu iha Autoridade Inspesaun no Fiskalizasaun Aitividade Ekonomia, Sanitária no Alimentár, Institutu Públiku (AIFAESA, I.P) no Institutu Kualidade Timor-Leste, Institutu Públiku (IQTL, I.P, siglá portugés), hodi halo teste produtu hosi rai-li’ur tama mai rai-laran.
Vise Ministru ba asuntu Parlamentár, Adérito Hugo da Costa, hateten kona-ba limitasaun laboratóriu loos, nune’e ministériu relevante sira iha Orsamentu Jerál Estadu (OJE) 2024 tau ona hodi haree atensaun posibilidade TL iha laboratóriu, maibé kestaun tékniku liu, nune’e nia-parte sei envia ba ministériu tutela hodi fó resposta konkreta kona-ba polítika, planu no alokasaun orsamentu.
Jornalista : Nelson de Sousa
Editór : Cancio Ximenes
